Boysun do‘ppisi huquqiy himoyaga olindi: unga geografik ko‘rsatkich maqomi berildi
Bu uning nomi, anʼanaviy ishlab chiqarish usullari va hudud bilan bog‘liq o‘ziga xos xususiyatlarini huquqiy muhofaza qilish imkonini beradi.
“Boysun do‘ppisi” Surxondaryo viloyatining Boysun tumani hududida qadimdan tikib kelinadigan milliy bosh kiyim sifatida geografik ko‘rsatkich maqomida davlat ro‘yxatidan o‘tkazildi. Bu haqda Intellektual mulk agentligi matbuot xizmati xabar berdi.
“Boysun do‘ppisi” dumaloq shaklda bo‘lib, piltado‘zi uslubida kashta bilan bezatiladi. Uning o‘ziga xosligi anʼanaviy tikish usuli, geometrik naqshlari va yorqin ranglar uyg‘unligida namoyon bo‘ladi.
Do‘ppilarni bezashda chilxol, chayongul, qo‘chqorshoxi, archa va ko‘zacha kabi anʼanaviy naqshlardan foydalaniladi.
“Boysun do‘ppisi”ning geografik ko‘rsatkich sifatida davlat ro‘yxatidan o‘tkazilishi mahsulotning Boysun hududi bilan bog‘liq o‘ziga xos xususiyatlarini huquqiy jihatdan muhofaza qilish imkonini beradi.
Shuningdek, bu maqom do‘ppi nomining huquqiy himoyasini taʼminlash, uning anʼanaviy xususiyatlari va ishlab chiqarish usullarini asrash hamda Boysun hunarmandchiligi mahsulotlarini ichki va xalqaro bozorlarda targ‘ib qilish uchun huquqiy asos yaratadi.
Maʼlumot uchun, geografik ko‘rsatkich — mahsulotning sifati, obro‘si yoki boshqa xususiyatlari muayyan geografik hudud bilan bog‘liq ekanini ko‘rsatuvchi intellektual mulk obyektidir.
