Makkaga dron hujumi: O‘zbekiston TIV hujumga urinishni keskin qoraladi
Vazirlik Saudiya Arabistoni bilan birdamligini bildirib, barcha tomonlarni vazminlikka va xalqaro huquq normalariga rioya qilishga chaqirdi.
O‘zbekiston Tashqi ishlar vazirligi Saudiya Arabistonining muqaddas Makka shahriga yo‘naltirilgan uchuvchisiz uchish apparatidan foydalanilgan hujumga urinishni qat’iyan qoraladi.
Vazirlik Saudiya Arabistoni Podshohligi bilan to‘liq birdamligini bildirib, muqaddas qadamjolar, tinch aholi va fuqarolik infratuzilmasiga tahdid soluvchi har qanday harakatni nomaqbul, deb hisoblashini ma’lum qildi.
O‘zbekiston TIV barcha tomonlarni maksimal darajada vazminlik namoyon etishga, xalqaro huquq normalariga qat’iy rioya qilishga, davlatlarning suvereniteti, mustaqilligi va hududiy yaxlitligini hurmat qilishga chaqirdi.
Shuningdek, vazirlik keskinlikni kamaytirish, mojaroning yanada tarqalishiga yo‘l qo‘ymaslik hamda mintaqada tinchlik, xavfsizlik va barqarorlikni ta’minlashga qaratilgan sa’y-harakatlarni qo‘llab-quvvatlashini bildirdi.
Ma’lumot uchun, 16-sentyabr kuni Saudiya Arabistoni havo mudofaa kuchlari Makka janubida, shaharning cheklangan havo hududiga kirishidan avval dronni urib tushirgan. Saudiya tomoni dron husiylar tomonidan uchirilganini bildirgan, biroq husiylar Makka tomon hujum uyushtirganini rad etgan.
