Prezidentga yana viza berilmadi: AQSh Falastin rasmiylariga cheklovni uzaytirdi
Falastin prezidenti Mahmud Abbos ketma-ket ikkinchi yil BMT Bosh Assambleyasidagi yig‘ilishlarda shaxsan ishtirok eta olmaydi.
AQSh Davlat departamenti Falastin ma’muriyati rasmiylari va Falastinni ozod qilish tashkiloti a’zolariga nisbatan viza cheklovlarini uzaytirdi. Qaror BMT Bosh Assambleyasining navbatdagi sessiyasi arafasida e’lon qilingan.
Cheklovlar sabab Falastin prezidenti Mahmud Abbos ham Nyu-Yorkka bora olmaydi. U o‘tgan yili ham AQSh vizasini ololmagani sababli BMT Bosh Assambleyasidagi nutqini videomurojaat orqali yo‘llagan edi.
AQSh Davlat departamenti qarorni Falastin ma’muriyati va Falastinni ozod qilish tashkilotining Vashington bilan bog‘liq majburiyatlarini bajarmagani hamda tinchlik istiqbollariga putur yetkazayotgan faoliyati bilan izohlagan.
AQSh tomoni Falastin ma’muriyatini Isroil-Falastin mojarosini xalqaro sudlar, jumladan, Xalqaro jinoiy sud va Xalqaro sud orqali xalqaro maydonga olib chiqishga urinishda, Falastin davlatini to‘g‘ridan to‘g‘ri muzokaralarsiz xalqaro miqyosda tan oldirishga intilishda ayblagan. Davlat departamenti, shuningdek, Falastin ma’muriyatining hujumlarda sudlangan shaxslar va ularning oilalariga to‘lovlar amalga oshirishi haqidagi pozitsiyasini ham keltirgan.
Shu bilan birga, Falastinning BMTdagi doimiy kuzatuvchi missiyasi xodimlari uchun mavjud viza imtiyozi saqlab qolinadi. Bu ularga BMTdagi faoliyatini davom ettirish imkonini beradi.
AQShning mazkur qarori BMT Bosh Assambleyasining navbatdagi sessiyasi boshlanishi oldidan qabul qilindi. Sessiya davomida Falastin masalasi, jumladan, davlat sifatida xalqaro tan olinishi va G‘azo hududidagi vaziyat muhokama qilinishi kutilmoqda.
