Rossiyadan 30, Qozog‘istondan 2 nafar bola: Vatanga qaytarish ishlari davom etmoqda
Rossiyadan ota-ona qaramog‘isiz qolgan yana 7 nafar voyaga yetmagan bola O‘zbekistonga qaytarildi.
2026 yil 15 sentyabr kuni Rossiya Federatsiyasidan ota-ona qaramog‘isiz qolgan voyaga yetmaganlarni Vatanga qaytarish bo‘yicha xizmat safarining uchinchi guruhi O‘zbekistonga yetib keldi.
O‘zbekistonning Rossiyadagi konsullik muassasalari ko‘magida navbatdagi guruh tarkibida 7 nafar voyaga yetmagan bola Vatanga qaytarildi. Ularning 3 nafari jazoni ijro etish muassasalarida jazo muddatini o‘tayotgan onalari tomonidan O‘zbekiston vakillariga topshirilgan.
Voyaga yetmaganlarni Vatanga qaytarish ishlari Ichki ishlar vazirligi, Sog‘liqni saqlash vazirligi hamda Prezident huzuridagi Ijtimoiy himoya milliy agentligi xodimlaridan iborat ishchi guruh tomonidan amalga oshirildi. Jarayonda Bolalar ombudsmani hamda O‘zbekistonning Rossiyadagi konsullik muassasalari ko‘mak ko‘rsatdi.
Mazkur guruhning qaytishi bilan Rossiyaga amalga oshirilgan xizmat safari yakunlandi. Safar davomida jami 30 nafar voyaga yetmagan bola Rossiyadan O‘zbekistonga qaytarilgan. Shuningdek, tegishli ishlar natijasida Qozog‘istondan 2 nafar bola Vatanga olib kelingan.
Shu tariqa, amalga oshirilgan tadbirlar doirasida jami 32 nafar voyaga yetmagan bolaning O‘zbekistonga qaytarilishi taʼminlangan.
Vatanga qaytarilgan bolalarning huquq va qonuniy manfaatlarini taʼminlash, ularni oilaviy muhitga qaytarish, zarur hollarda muqobil joylashtirish shakllariga joylashtirish hamda ularga ijtimoiy, tibbiy, psixologik va boshqa xizmatlarni ko‘rsatish bo‘yicha choralar ko‘rilmoqda.
Bolalarning keyingi holati va oilaga moslashuvi yashash manzili bo‘yicha “Inson” ijtimoiy xizmatlar markazlari tomonidan ijtimoiy hamrohlik asosida kuzatib boriladi.
Xorijda ota-ona qaramog‘isiz qolgan voyaga yetmaganlarni Vatanga qaytarish ishlari davom ettirilmoqda. Xususan, Gruziyada ota-ona qaramog‘isiz qolgan 1 nafar bolani O‘zbekistonga qaytarish maqsadida xizmat safari amalga oshirilishi kutilmoqda.
Shuningdek, Turkiya bilan voyaga yetmaganlarni Vatanga qaytarish masalalari yuzasidan muzokaralar olib borilmoqda.
