Yangi Toshkentning ertangi kuni o‘zimizga bog‘liq — Saida Mirziyoyeva
Saida Mirziyoyeva Yangi Toshkentdagi qurilish jarayonlari bilan tanishib, tadbirkorlarni hududga sarmoya kiritish, qurilish va biznes loyihalarini yo‘lga qo‘yishga chaqirdi.
Saida Mirziyoyeva Yangi Toshkent hududida bo‘lib, zamonaviy bino va inshootlarning qurilish jarayoni bilan tanishdi.
Uning ta’kidlashicha, yangi shahar jadal sur’atlarda qad rostlab, rivojlanmoqda. Prezident tashabbusi bilan boshlangan bunyodkorlik ishlari doirasida bugungi kunda yirik va keng ko‘lamli loyihalar amalga oshirilmoqda.
Qayd etilishicha, Yangi Toshkentning shahar konsepsiyasi britaniyalik me’morlar tomonidan uzoq istiqbolni hisobga olgan holda ishlab chiqilgan. Mazkur konsepsiya kelgusi o‘n yilliklarda shaharning izchil rivojlanishi uchun asos bo‘lib xizmat qilishi ko‘zda tutilgan.
Saida Mirziyoyeva Yangi Toshkentning kelajagi endi shaharda amalga oshiriladigan loyihalar va yaratiladigan imkoniyatlarga bevosita bog‘liq ekanini ta’kidladi.
Shu munosabat bilan u tadbirkorlarni Yangi Toshkentga alohida e’tibor qaratishga chaqirdi. Xususan, hududga sarmoya kiritish, yangi qurilish loyihalarini amalga oshirish va biznes faoliyatini yo‘lga qo‘yish uchun keng imkoniyatlar mavjudligi qayd etildi.
Saida Mirziyoyeva Yangi Toshkentning istiqboli va imkoniyatlari beqiyos ekanini ta’kidlab, yangi shaharni birgalikda bunyod etish muhimligini qayd etdi.
