3472 so‘mgacha: Toshkent viloyatida ichimlik suvi va oqova suv tariflari oshiriladi

Toshkent viloyatida ichimlik suvi taʼminoti va oqova suv xizmatlari uchun yangi tariflar tasdiqlandi. Ular 2026-yil 3-oktyabrdan kuchga kiradi.

Xalq deputatlari Toshkent viloyati Kengashining 16-sentyabrdagi qaroriga ko‘ra, «Toshkent viloyati suv taʼminoti» AJ xizmatlari uchun 1 kub metr ichimlik suvining QQSsiz tarifi aholi uchun 3100 so‘m, byudjet tashkilotlari va ulgurji isteʼmolchilar uchun 16 ming so‘m etib belgilangan.

QQS bilan hisoblaganda yangi tariflar quyidagicha bo‘ladi:

aholi uchun ichimlik suvi — 3472 so‘m;

byudjet tashkilotlari va ulgurji isteʼmolchilar uchun — 17 920 so‘m.

Oqova suv xizmatining QQSsiz tarifi esa:

aholi uchun — 1680 so‘m;

byudjet tashkilotlari va ulgurji isteʼmolchilar uchun — 4480 so‘m etib belgilangan.

Avvalgi tariflarda aholi uchun 1 kub metr ichimlik suvi 2600 so‘m, oqova suv xizmati esa 1300 so‘m edi. Byudjet tashkilotlari va ulgurji isteʼmolchilar uchun mazkur tariflar mos ravishda 15 ming va 3000 so‘mni tashkil etgan.

Taʼkidlanishicha, tariflarni qayta ko‘rib chiqishda suv taʼminoti tizimini taʼmirlash va modernizatsiya qilish, elektr energiyasi, ish haqi, soliqlar hamda xorijiy kreditlar bo‘yicha xarajatlar inobatga olingan.

Viloyatda markazlashgan ichimlik suvi bilan taʼminlanganlik darajasini kelgusi besh yilda 82 foizdan 95 foizga, kanalizatsiya qamrovini esa 23 foizdan 45 foizga yetkazish rejalashtirilgan. Buning uchun yangi suv va kanalizatsiya tarmoqlari hamda tegishli inshootlarni barpo etish ko‘zda tutilgan.

Shuningdek, hisoblagichlar mavjud bo‘lmagan holatlarda sovuq suv xizmati uchun to‘lovlarga 1,5 baravar oshiruvchi koeffitsiyent qo‘llanadi.

Isteʼmolchilar 3-oktyabrgacha ikki oylik to‘lovni oldindan eski tariflar bo‘yicha amalga oshirishlari mumkin.