Chiqindidan elektr: Jizzaxda kuniga 1 000 tonna chiqindi qayta ishlanadi

Jizzax va Sirdaryo viloyatlarida qattiq maishiy chiqindilarni termik usulda qayta ishlash orqali elektr energiyasi ishlab chiqarish loyihasi amalga oshiriladi.

Prezidentning 17-sentyabrdagi qaroriga ko‘ra, Jizzax viloyatidagi loyiha uchun 2026–2028-yillarda 130 mln dollar to‘g‘ridan-to‘g‘ri xorijiy investitsiya jalb qilinadi.

Loyiha Xitoyning China Civil Engineering Construction Corporation (CCECC) va Cevia Enviro Inc. (Henan Investment Group) kompaniyalari konsorsiumi tomonidan amalga oshiriladi. Investor va O‘zbekiston hukumati nomidan Investitsiyalar, sanoat va savdo vazirligi o‘rtasida 14-sentyabr kuni investitsiya shartnomasi imzolangan.

Qarorga muvofiq, Jizzax viloyatida kuniga 1 000 tonna qattiq maishiy chiqindini termik usulda qayta ishlash hamda buning natijasida yiliga 110 mln kVt·soat elektr energiyasi ishlab chiqarish quvvatiga ega uskunalar ishga tushiriladi.

Loyiha uchun Jizzax viloyati hokimligiga Sharof Rashidov tumanidagi “G‘ozg‘ontepa” MFY hududidan 10,8 gektar yer ajratiladi.

Ishlab chiqariladigan elektr energiyasini “O‘zenergosotish” AJ 30 yil davomida kafolatlangan tarzda sotib olishi belgilangan. Shu bilan birga, Chiqindilarni boshqarish va sirkulyar iqtisodiyotni rivojlantirish agentligi loyiha kompaniyasini mazkur muddat davomida belgilangan hajmdagi qattiq maishiy chiqindilar bilan taʼminlab boradi.

Loyiha kompaniyasi qurilish davridagi majburiyatlarining bajarilishini taʼminlash uchun 8 mln dollar miqdorida bank kafolati taqdim etadi.

Shuningdek, chiqindilarni utilizatsiya qilish va qayta ishlashga ixtisoslashgan sanoat zonasi tashkil etilishi, loyiha uchun zarur elektr va boshqa infratuzilma obyektlari barpo etilishi ko‘zda tutilgan.

Qarorda loyiha doirasida jalb etiladigan xorijiy mutaxassislar va ularning oila aʼzolari uchun viza hamda yashash masalalarida ayrim yengilliklar ham belgilangan.

Bundan tashqari, loyiha hujjatlari ekologik ekspertizadan o‘tkazilishi, shuningdek, tabiatni muhofaza qilish bo‘yicha belgilangan talablarga qatʼiy rioya etilishi shart.