Haydovchilar maoshi bo‘yicha e’tirozlar: “Toshshahartransxizmat” maxsus ishchi guruh tuzdi
Ijtimoiy tarmoqlarda avtobus haydovchilarining maoshi kechikayotgani va to‘lovlardagi noaniqliklar yuzasidan e’tirozlari aks etgan videolar tarqaldi.
Ijtimoiy tarmoqlarda avtobus haydovchilarining oylik maoshi kechikayotgani va to‘lovlardagi noaniqliklar yuzasidan e’tirozlari aks etgan videolar tarqaldi. “Toshshahartransxizmat” holat yuzasidan izoh berib, murojaatlarni o‘rganish uchun maxsus ishchi guruh tuzilganini ma’lum qildi.
Jamiyat ma’lumotiga ko‘ra, “Toshshahartransxizmat” tarkibidagi sakkizta avtobus saroyida faoliyat yurituvchi haydovchilarning maoshi ishlangan oy yakunlanganidan so‘ng hisoblanadi.
Bunda keyingi oyning 1-sanasidan 10-sanasigacha haydovchining bir oy davomida ishlagan soatlari, bajargan qatnovlari soni va muntazamligi tekshiriladi. Shuningdek, uning yo‘nalishda harakatlangan vaqtida sodir etgan qoidabuzarliklari ham o‘rganiladi.
Barcha ma’lumotlar yig‘ilgach, keyingi oyning 10-sanasidan haydovchining maoshi bo‘yicha aniq hisob-kitob chiqariladi. Shundan so‘ng belgilangan maosh to‘lanadi.
“Toshshahartransxizmat” avgust oyi uchun hisoblangan maoshlar barcha haydovchilarga 15-sentabrdan boshlab to‘lana boshlanganini bildirgan.
Videomurojaatlarda bildirilgan e’tirozlarni tekshirish uchun jamiyat mas’ul xodimlaridan iborat maxsus ishchi guruh ham tuzilgan. Haydovchilarning murojaatlari birma-bir o‘rganilib, kamchiliklar aniqlangan taqdirda mas’ullarga nisbatan belgilangan tartibda chora ko‘rilishi aytilgan.
Tekshiruv yakunlari bo‘yicha qo‘shimcha ma’lumot beriladi.
