Istanbul–Toshkent reysi 3 soatdan ortiq kechikdi: Raqobat qo‘mitasi o‘rganish boshladi

 

Ijtimoiy tarmoqlarda “Centrum Air” aviakompaniyasining Istanbul–Toshkent yo‘nalishidagi C6302 reysi 3 soatdan ortiq kechikkani va bu holat yo‘lovchilar e’tiroziga sabab bo‘lgani haqida xabarlar tarqaldi.

 

Mazkur holat Raqobat qo‘mitasi tomonidan nazoratga olinib, o‘rganilmoqda.

 

O‘rganish davomida, xususan, reys kechikishi vaqtida yo‘lovchilarga zarur axborot berilgani, tegishli xizmatlar ko‘rsatilgani hamda iste’molchilar huquqlari ta’minlanganiga e’tibor qaratilmoqda.

 

Qo‘mita o‘rganish yakunlari bo‘yicha qonunbuzarlik holatlari aniqlangan taqdirda, o‘z vakolatlari doirasida tegishli ta’sir choralarini ko‘rishini ma’lum qildi.

 

Fuqarolar aviatashuv xizmatlari ko‘rsatishda iste’molchilar huquqlariga rioya etilmasligi bilan bog‘liq holatlar yuzasidan Raqobat qo‘mitasining 1159 yagona ishonch telefoni orqali murojaat qilishlari mumkin.

 

Qo‘mita ma’lumotiga ko‘ra, bugungi kungacha “Centrum Air” va boshqa aviakompaniyalar xizmatlaridan norozilik yuzasidan 270 dan ortiq murojaat kelib tushgan.

 

Shuningdek, amaldagi qoidalarga aviakompaniya aybi bilan parvoz belgilangan jadvaldan kechiktirilgan yoki yo‘lovchi manziliga kech yetkazilgan holatlarda pul kompensatsiyasi miqdori va uni to‘lash tartibini belgilash bo‘yicha Transport vazirligiga bir necha ko‘rsatmalar berilgan.

 

Hozirda iste’molchilar huquqlarini himoya qilishni ta’minlash bo‘yicha qonunchilikni takomillashtirish ishlari davom ettirilmoqda.

 

“Centrum Air” reysi bo‘yicha o‘rganish yakunlari yuzasidan qo‘shimcha ma’lumot taqdim etilishi ma’lum qilindi.