Orolbo‘yida parrandachilik: Kegeyli parrandachilikni rivojlantirmoqda
Shavkat Mirziyoyev Qoraqalpog‘istonga tashrifi davomida “Kegeyli baraka naslli parranda” korxonasi faoliyati bilan tanishdi. 7,8 mln dollarlik loyihada 130 ming tovuq parvarish qilinmoqda.
Prezident Shavkat Mirziyoyev Qoraqalpog‘istonga tashrifi davomida Kegeyli tumanidagi “Kegeyli baraka naslli parranda” korxonasi faoliyati bilan tanishdi.
Mazkur yirik korxona davlat rahbarining 2024-yil 28-iyundagi parrandachilik sohasini qo‘llab-quvvatlashga qaratilgan qarori asosida tashkil etilgan. Loyihaning umumiy qiymati 7,8 mln dollarni tashkil etadi.
21 gektar maydonda joylashgan korxona ishga tushirilishi natijasida 70 nafar mahalliy aholi doimiy ish bilan ta’minlangan.
Majmua bir vaqtning o‘zida 200 mingtagacha tovuq boqish imkoniyatiga ega. Hozirda bu yerda 130 ming tovuq parvarish qilinmoqda. Korxona davlat budjetiga 4,8 mlrd so‘m tushum keltirib, tuman iqtisodiyotiga hissa qo‘shmoqda.
Majmuada yiliga 27,5 mln dona inkubatsion tuxum yetishtiriladi. Mahsulotlar tovuq va bir kunlik jo‘ja ko‘rinishida sotuvga chiqariladi.
Korxonaning ozuqa bilan ta’minoti ham o‘zida yo‘lga qo‘yilgan. Bu yerda sutkasiga 100 tonna yem ishlab chiqarish quvvatiga ega alohida zavod qurilgan bo‘lib, ishlab chiqarish jarayonlari to‘liq avtomatlashtirilgan.
Qayd etilishicha, ilgari Qoraqalpog‘istonga tovuq va tuxum mahsulotlari mamlakatimizning boshqa hududlaridan olib kelingan. Kegeyli tumanidagi yangi korxona esa Orolbo‘yi hududining ushbu mahsulotlarga bo‘lgan ehtiyojini qoplash bilan birga, eksportni ham yo‘lga qo‘ygan.
Joriy yilning sentabr oyiga qadar Afg‘onistonga 1,1 mln dollarlik mahsulot eksport qilingan. Yil yakuniga qadar bu ko‘rsatkichni 1,5 mln dollarga yetkazish rejalashtirilgan.
Shuningdek, yil oxirigacha yana 8,5 gektar maydonda qiymati 5 mln dollarlik yangi fabrikani ishga tushirish mo‘ljallangan. Loyiha amalga oshirilishi bilan ishlab chiqarish hajmi oshib, qo‘shimcha ish o‘rinlari yaratiladi.
Prezident bunday zamonaviy majmualar kelgusida yirik parrandachilik xoldinglariga aylanishi, yangi va yuqori maoshli ish o‘rinlarini yaratishi zarurligini ta’kidladi. Mutasaddilarga bu borada tegishli ko‘rsatmalar berildi.
