Pensiyani ko‘paytirib berish va’dasi: Urganchda hokim yordamchisi ushlandi
U fuqaroning turmush o‘rtog‘i pensiyasini oshirib berishni va’da qilib, undan 15 mln so‘m olgan.
Bosh prokuratura huzuridagi Departamentning Xorazm viloyati boshqarmasi hamda boshqa huquqni muhofaza qiluvchi organlar xodimlari hamkorligida tezkor tadbir o‘tkazilgan.
Unda Urganch shahrining “Jambal” mahallasida tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchisi B. X. fuqaro Sh. Yu. ning ishonchiga kirib, go‘yoki yuqori lavozimlarda ishlovchi tanishlari orqali uning turmush o‘rtog‘i Z. K. ning yoshga doir pensiya miqdorini oshirib berishini va’da qilgani aniqlangan.
Buning evaziga B. X. Sh. Yu. dan 15 mln so‘mni firibgarlik yo‘li bilan olgani aytilmoqda. Shundan 14,9 mln so‘mini qaytarib berayotgan vaqtida u tezkor tadbir davomida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.
