Sho‘r yerda bog‘dorchilik: Qoraqalpog‘istonda intensiv bog‘lar maydoni 10 ming gektarga yetkaziladi

 

Prezident Shavkat Mirziyoyev Qoraqalpog‘iston Respublikasi Kegeyli tumanidagi “ADM Agro” korxonasining sanoatlashgan intensiv bog‘ida yo‘lga qo‘yilgan zamonaviy agrar tajriba bilan tanishdi.

 

Jizzax viloyatida avtomobil ishlab chiqarayotgan “ADM Group” kompaniyasi faoliyatini boshqa yo‘nalishlarda ham kengaytirmoqda. Orolbo‘yida intensiv bog‘dorchilikni rivojlantirish ana shunday yangi yo‘nalishlardan biri bo‘lgan.

 

55 mlrd so‘m mablag‘ yo‘naltirilgan loyiha Orolbo‘yining og‘ir iqlimi va sho‘r tuprog‘ida ham zamonaviy texnologiyalar asosida samarali bog‘dorchilikni yo‘lga qo‘yish mumkinligini ko‘rsatmoqda.

 

Bog‘ning umumiy maydoni 330 gektarni tashkil etadi. Bu yerda mahalliy aholi uchun 100 ta doimiy ish o‘rni yaratilgan.

 

Hozirda 69 gektar maydonga AQShda seleksiya qilingan 250 ming tup qora olxo‘ri ko‘chati ekilgan. Mazkur nav sho‘r yerlarga chidamliligi bilan ajralib turadi. Ko‘chatlar ekilganidan ikki yil o‘tib hosilga kirishi, bir tup daraxtdan 50–60 kilogrammgacha hosil olish mumkinligi qayd etildi.

 

Mevaning yirikligi va danagining oson ajralishi uni qayta ishlash uchun ham qulay hisoblanadi.

 

Yerdan samarali foydalanish maqsadida daraxtlar orasiga hosildor pomidor navi ham ekilgan. Ushbu ekin maydonining har bir gektaridan o‘rtacha 40–45 tonna hosil olish mumkin.

 

Bog‘da suv tanqisligi muammosini kamaytirish uchun yopiq drenaj va tomchilatib sug‘orish tizimlari joriy etilgan. Oddiy sug‘orishda bir gektar maydonga 12 ming litr suv sarflansa, yangi tizimda bu ko‘rsatkich 5 ming litrni tashkil etmoqda. Natijada suv sarfi 60 foizgacha tejalmoqda.

 

Tizim orqali suv va mineral o‘g‘itlar to‘g‘ridan-to‘g‘ri o‘simlik ildiziga yetkaziladi. Berilgan mineral o‘g‘itlarning 90 foizigacha o‘simlik tomonidan o‘zlashtirilishi, namlikning bir maromda saqlanishi esa hosildorlikni oshirishi aytildi. Jarayon to‘liq avtomatlashtirilgani sababli katta maydonlarni bitta operator boshqarishi mumkin.

 

Shuningdek, yetishtirilgan mevalarni shu yerning o‘zida quritish va qayta ishlash imkonini beruvchi uskunalar o‘rnatilgan. Bu mahsulotning qo‘shimcha qiymatini oshirishga xizmat qilmoqda.

 

Tayyor mahsulotlarni eksport qilish bo‘yicha Xitoy, Koreya va Rossiya bilan shartnomalar imzolangan.

 

Kegeyli tumanidagi mazkur tajribani Qoraqalpog‘istonning boshqa hududlarida ham kengaytirish rejalashtirilgan. Intensiv bog‘lar maydonini 10 ming gektarga yetkazish hamda 40 mingta doimiy va mavsumiy ish o‘rnini yaratish ko‘zda tutilgan.

 

Davlatimiz rahbari shu yerda fermerlar bilan muloqot qilib, ularning fikrlarini tingladi. Fermerlar mamlakatimizda amalga oshirilayotgan islohotlarni e’tirof etib, Qoraqalpog‘iston taraqqiyotiga qaratilayotgan e’tibor uchun minnatdorlik bildirdi.