12 ta mashina ishtirokidagi YTH va 3 kishi halok bo‘ldi: Rossiyada o‘zbekistonlik haydovchi qamaldi
O‘zbekiston fuqarosi haydovchilik guvohnomasisiz, tormoz tizimi nosoz va meʼyoridan ortiq yuklangan Shacman samosvalini boshqarib, YTHga sabab bo‘lgan.
Rossiyaning Ufa shahrida 12 ta transport vositasi ishtirokidagi yirik yo‘l-transport hodisasini sodir etib, uch kishining o‘limiga sabab bo‘lgan O‘zbekiston fuqarosiga hukm chiqarildi. Bu haqda Boshqirdiston prokuraturasiga tayanib, “Kommersantʼ” xabar berdi.
Aniqlanishicha, 28 yoshli erkak 2025-yil oktyabr oyida haydovchilik guvohnomasisiz Shacman samosvalini boshqargan. Yuk mashinasining tormoz tizimi nosoz bo‘lgan. Shuningdek, transport vositasi meʼyoridan ortiq yuklangan. Haydovchi esa avtomobilning texnik holati va yo‘l sharoitlarini hisobga olmagan hamda belgilangan tezlikdan oshgan.
Natijada u yuk mashinasini boshqarishni yo‘qotib, Ufimskoye shosse va Chudskoy ko‘chalari kesishmasidagi tartibga solingan chorrahaga yaqinlashayotganda 12 ta transport vositasi bilan to‘qnashgan.
Hodisa oqibatida uch kishi halok bo‘lgan, bir yo‘lovchi og‘ir tan jarohati olgan.
Ufa shahri Oktyabr tuman sudi haydovchini yo‘l harakati qoidalarini buzgani va ehtiyotsizlik oqibatida ikki yoki undan ortiq kishining o‘limiga sabab bo‘lgani uchun aybdor deb topgan.
Sud hukmiga ko‘ra, unga 9 yil muddatga ozodlikdan mahrum qilish jazosi tayinlangan. Shuningdek, jazoni o‘tab bo‘lganidan keyin yana 3 yil muddatga transport vositasini boshqarish huquqidan mahrum qilingan.
