17,5 foizdan 12 foizgacha: Qoraqalpog‘istonda oilaviy tadbirkorlik kreditlari arzonlashtiriladi
Kelasi yili “drayver” loyihalarga 100 million dollar yo‘naltirilib, kamida 50 ming odamni daromadli qilish maqsad qilingan.
Qoraqalpog‘istonni kambag‘allikdan xoli hududga aylantirish, aholi bandligi va daromadlarini oshirish masalalari Prezident Shavkat Mirziyoyev raisligidagi yig‘ilishda muhokama qilindi.
Qayd etilishicha, hududdagi 2 ming nafar tadbirkor so‘nggi uch yil davomida 2 trillion 145 milliard so‘mlik kreditni o‘z vaqtida qaytarib, banklarning ishonchli mijoziga aylangan.
“Mijozni o‘stirish” modeli asosida ushbu tajribani kengaytirib, yana kamida 30–40 ming kishini ishli va daromadli qilish imkoniyati mavjud.
Shu maqsadda hududga mas’ul bank ishonchli mijozlar uchun 16 foiz stavkada 300 milliard so‘mlik kredit liniyasini ochmoqda. Tadbirkorlikni rivojlantirish kompaniyasi kredit foizining 4 foizini qoplab berishi hisobiga tadbirkor uchun yakuniy stavka 12 foizni tashkil etadi.
Qolgan 8 ta bankka ham bir oy muddatda shunday qulay kredit mahsulotlarini ishlab chiqish topshirildi.
Shuningdek, Qoraqalpog‘istonda oilaviy tadbirkorlik kreditlari stavkasi 17,5 foizdan 12 foizgacha tushiriladi.
Kelasi yili ushbu yo‘nalishdagi resurslar 2 karra oshiriladi. Uychi va Zarbdor tajribasi asosida “drayver” loyihalarni amalga oshirish uchun 100 million dollar yo‘naltiriladi. Bu orqali kamida 50 ming kishini daromadli qilish vazifasi qo‘yildi.
Hududda biznes infratuzilmasini rivojlantirishga ham alohida e’tibor qaratilmoqda. So‘nggi ikki yilda bu maqsadga 370 milliard so‘m ajratilishi hisobiga 2 ming 200 ta savdo-servis obyekti ishga tushirilib, 10 mingga yaqin ish o‘rni yaratildi.
Yig‘ilishda Nukus tumanidagi Diyqan arna mahallasida 60 o‘rinli bog‘cha, futbol va vorkaut maydonchalari tashkil etilgani ham qayd etilib, bunday loyihalar mahallalarda yangi imkoniyat va qulayliklar yaratishi ta’kidlandi.
Tuman hokimlariga joriy yilda iqtisodiy o‘sish va bandlikka turtki beradigan yana ikkitadan loyiha ishlab chiqib, 10 ming kishini daromadli qilish topshirildi.
Mazkur loyihalarni moliyalashtirish uchun 100 milliard so‘m ajratiladi va bir hafta ichida mablag‘larni yo‘naltirish boshlanadi.
