45,1 mlrd dollar va hali to‘liq hisob emas: AQShning Eronga qarshi urushi qanchaga tushdi?

 

AQShning Eronga qarshi harbiy operatsiyasi xarajatlari 45,1 mlrd dollarga yetgan. Bu haqda CNN Pentagonning Kongressga taqdim etgan ma’lumotlariga tayanib xabar berdi.

 

Pentagon hisob-kitobiga ko‘ra, 3-sentabr holatiga harbiy operatsiyalarning asosiy xarajatlari 43,6 mlrd dollarni tashkil etgan. Bunga qo‘shimcha ravishda yoqilg‘i uchun 1,5 mlrd dollar sarflangan.

 

Yangi hisob-kitob avvalgi baholardan ham yuqori. Pentagon iyul oyida operatsiya xarajatlarini 37,5 mlrd dollar deb baholagan edi. Kongressning Byudjet idorasi esa 1-avgust holatiga xarajatlarni 38 mlrd dollar deb hisoblagan.

 

Shu bilan birga, 45,1 mlrd dollarlik summa yakuniy hisob emas. Pentagon ma’lumotlarida Erondagi hujumlar oqibatida shikastlangan AQSh harbiy bazalari va binolarini ta’mirlash xarajatlari hisobga olinmagan. Shuningdek, harbiy operatsiyalarning ayrim bilvosita xarajatlari bo‘yicha batafsil ma’lumotlar ham keltirilmagan.

 

Pentagonning alohida hisob-kitobiga ko‘ra, 43,6 mlrd dollarning 28,1 mlrd dollari sarflangan o‘q-dorilarni almashtirish, 4,3 mlrd dollari esa yo‘qotilgan harbiy texnikalarni qoplash uchun mo‘ljallangan. Yana 11,2 mlrd dollar operatsiyaning qo‘shimcha xarajatlariga to‘g‘ri keladi.

 

AQSh Kongressining Byudjet idorasi harbiy harakatlar davom etgan taqdirda, avgust oyidan keyin operatsiyaning har oyda taxminan 2–3 mlrd dollarga tushishi mumkinligini bildirgan. Mojaro kuchaygan davrlarda xarajatlar bundan ham yuqori bo‘lishi mumkin.