AI xatosi: AQSH-Xitoy urishi boshlanishiga sal qoldi

AQSH harbiylari sunʼiy intellekt yordamida tayyorlangan xato razvedka hisoboti sabab Yaqin Sharqda Xitoyga tegishli kemani ushlash va uning bortiga chiqishga deyarli kirishgan. Bu haqda CNN to‘rt nafar manbasiga tayanib xabar berdi.

Maʼlum qilinishicha, 2026-yil bahorida, AQSHning Eronga qarshi harbiy amaliyotlari davom etayotgan paytda, AQSH harbiylari orasida Xitoy kemasi yadroviy qurol dasturiga aloqador qismlarni tashiyotgani haqidagi razvedka hisoboti tarqalgan.

Shundan so‘ng kemani ushlash bo‘yicha operatsiya rejalashtirilgan. CNN manbalariga ko‘ra, qurollangan harbiy xizmatchilar kemaga chiqishga tayyorlangan, harbiy samolyotlar esa havoga ko‘tarilgan.

Biroq operatsiya boshlanishidan biroz oldin rasmiylar hisobotni batafsil tekshirgan. Shunda uning sunʼiy intellekt yordamida tayyorlangani va tahlilda foydalanilgan chatbot kema bortidagi yukni noto‘g‘ri aniqlagani maʼlum bo‘lgan.

CNN maʼlumotiga ko‘ra, maxsus operatsiyalar qo‘mondonligi tahlilchisi kema yuk manifestiga oid maʼlumotlarni chatbot orqali tahlil qilgan. Tizim ochiq manbalardagi maʼlumotlarni hukumat ixtiyoridagi maxfiy signal razvedkasi maʼlumotlari bilan birlashtirib, noto‘g‘ri xulosa chiqargan. Keyinchalik ushbu xulosa yana AI yordamida harbiy razvedka hisobotiga aylantirilgan va tegishli kanallar orqali tarqatilgan.

Kema aslida qanday yuk tashiyotgani esa hozircha ochiqlanmagan.

CNN manbalaridan biri hisobotni “mutlaqo yolg‘on” deb atagan va voqea “deyarli urushni boshlab yuborganini” bildirgan. Chunki Xitoy kemasiga qarshi AQSH harbiylarining bunday operatsiyasi ikki davlat o‘rtasida jiddiy harbiy keskinlikni keltirib chiqarishi mumkin edi.