“Bunker” va masofadan yechilgan testlar: noqonuniy “SAT” sertifikati olish sxemasi fosh etildi
Toshkent viloyatida fuqarolarga “SAT” sertifikatini noqonuniy olib berish bilan shug‘ullangan guruh faoliyatiga chek qo‘yildi.
DXX Toshkent viloyati bo‘yicha boshqarmasi hamda viloyat IIBB xodimlari hamkorligida o‘tkazilgan tezkor tadbirda fuqarolarga oliy ta’lim muassasalariga o‘qishga kirishda foydalaniladigan matematika va ingliz tili bo‘yicha xalqaro “SAT” sertifikatini noqonuniy tarzda olib berish bilan shug‘ullangan guruh faoliyatiga chek qo‘yildi.
Aniqlanishicha, guruh a’zolarining aksariyati Yevropadagi nufuzli universitetning Toshkent shahridagi filialida, yana bir nafari Osiyoning yetakchi davlatlaridan biridagi oliy ta’lim muassasasining poytaxtdagi filialida tahsil olgan. Ular Yangihayot tumanidagi xususiy maktab binosida maxsus “bunker” tashkil qilgan.
Guruh faoliyatida IT sohasiga ixtisoslashgan MChJ mutaxassisi ham ishtirok etgan. U yashirin tarzda tizimga kirib, test savollarini ishlash imkoniyatini yaratgan. Shundan so‘ng talabalar masofadan turib, imtihon topshirayotgan fuqarolar o‘rniga test savollarini yechish bilan shug‘ullangan.
Bundan tashqari, guruh a’zolaridan biri xalqaro “SAT” sertifikatini qo‘lga kiritmoqchi bo‘lgan 5 nafar fuqaroning har biridan 1,5 ming AQSH dollaridan talab qilgan. U hatto ulardan birining pul mablag‘larini kriptohamyon orqali olishga ulgurgan.
Holat yuzasidan qonunbuzarlarga nisbatan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda tergov harakatlari olib borilmoqda.
