Elektr ishlab chiqarish 4 karra oshdi: Qoraqalpog‘iston “yashil” energiya markaziga aylanadi
2030-yilgacha 400 megavattli energiya saqlash quvvatlari yaratiladi va “yashil” energiya ulushi 76 foizga yetkaziladi.
Nukus shahrida Prezident Shavkat Mirziyoyev raisligida Qoraqalpog‘istonni ijtimoiy-iqtisodiy rivojlantirish masalalariga bag‘ishlangan yig‘ilish bo‘lib o‘tmoqda.
Davlat rahbari mustaqilligimizning 35 yillik bayrami shukuhi davom etayotgan kunlarda Qoraqalpog‘iston ahli bilan yuzma-yuz ko‘rishib turganidan mamnunligini bildirdi.
Ta’kidlanganidek, so‘nggi yillarda hududni rivojlantirish uchun katta mablag‘, imtiyoz va sharoitlar yaratildi. Jumladan, foyda, yer va mol-mulk soliqlari 2 karra, sanoat uchun elektr tarifi 15 foizga pasaytirildi. Ijtimoiy soliq stavkasi esa 1 foiz etib belgilandi.
O‘tgan yili Qoraqalpog‘istonga 1 milliard 700 million dollar investitsiya kiritildi. Bu ko‘rsatkich 2021-yilga nisbatan 22 karra ko‘p.
Joriy yilning birinchi yarmida hudud iqtisodiyoti 10,2 foiz o‘sdi. Natijada Qoraqalpog‘iston iqtisodiy o‘sish sur’atlari bo‘yicha Toshkent shahridan keyingi ikkinchi o‘rinni egalladi.
Energetika sohasida ham sezilarli natijalarga erishilgan. So‘nggi yillarda hududda 860 megavattli yangi energetika quvvatlari ishga tushirildi. Beruniy va Qorao‘zak tumanlarida shamol elektr stansiyalarining qurilishi hisobiga “yashil” energiyaning ulushi 23 foizga yetdi.
Elektr energiyasi ishlab chiqarish hajmi esa 4 karra oshib, 5 milliard 330 million kilovatt-soatni tashkil etdi. Bu aholi va korxonalarning yillik ehtiyojidan qariyb 3 barobar ko‘p.
Yig‘ilishda Qoraqalpog‘istonda energetika salohiyatini yanada kengaytirishga qaratilgan yangi loyihalar haqida ham ma’lumot berildi. Kecha hududda umumiy qiymati 7 milliard dollarlik 47 ta yangi loyihani amalga oshirishga start berildi.
Jumladan, Qo‘ng‘irot tumanida 2 milliard 600 million dollarlik, quvvati 1,5 ming megavatt bo‘lgan shamol elektr stansiyasini qurish boshlandi. Loyiha doirasida 1,5 ming kilometr yuqori kuchlanishli elektr tarmoqlari hamda 500 kilovoltli 3 ta podstansiya barpo etiladi.
2030-yilgacha Qoraqalpog‘istonda umumiy quvvati 3 ming 300 megavatt bo‘lgan shamol elektr stansiyalarini ishga tushirish rejalashtirilgan. Natijada “yashil” energiyaning hududdagi ulushi 76 foizga yetkaziladi. Shuningdek, 400 megavattli energiya saqlash quvvatlari yaratiladi.
Bu loyihalar amalga oshirilishi natijasida Qoraqalpog‘iston “yashil” energiya ishlab chiqarish bo‘yicha mintaqaning eng yirik markazlaridan biriga aylanishi kutilmoqda.
