Eronda namoyish: yuz minglab odam AQSHga qarshi namoyishga chiqdi

18-sentyabr kuni Tehronda yuz minglab odam ishtirokida AQSHga qarshi yirik namoyish o‘tkazildi. Tadbirda hukumat tomonidan yaqinda tuzilgan ko‘ngillilar kuchi namoyish qilinib, uning aʼzolari qurolli va favqulodda vaziyatlarga javob berish bo‘yicha cheklangan tayyorgarlikdan o‘tishi maʼlum qilindi.

 
Namoyish ishtirokchilari Tehron markazidagi ko‘chalardan harbiy kiyimlarda o‘tgan. Ayrimlari bayroq va qurollarni ko‘targan. Tadbir davomida dronlar, zenit mudofaa tizimlari va boshqa harbiy texnika ham namoyish etilgan.

 
Eron rasmiylari mitingda 313 ming kishi qatnashganini bildirdi. Biroq bu raqamni mustaqil ravishda tasdiqlashning imkoni bo‘lmagan. Eron Inqilobiy gvardiyasi qo‘mondoni Hasan Hassanzoda esa yangi ko‘ngillilar kampaniyasida 600 mingdan ortiq kishi ro‘yxatdan o‘tganini, mashg‘ulotlarga bir milliondan ortiq odam jalb etilishi kutilayotganini aytdi.

 
“Eron uchun jonini fido qilishga tayyorlar” mazmunini anglatuvchi «Janfada-e Iran» kampaniyasi doirasida tashkil etilgan kuch mamlakat xavfsizlik tizimida qo‘shimcha qatlam sifatida xizmat qilishi ko‘zda tutilgan. Eron rasmiylari bu tashabbusni mamlakatni ehtimoliy yangi mojaro va xavflarga tayyorlash strategiyasining bir qismi sifatida ko‘rsatmoqda.

 
Namoyishda Eron prezidenti Masʼud Pezeshkiyon va Basij kuchlari rahbari Husayn Toib ham qatnashdi. Toib ko‘ngillilar “to‘laqonli mudofaa”ga tayyor bo‘lishini taʼkidladi. Miting AQSHning Eron portlariga nisbatan dengiz blokadasi va yangi sanksiyalar fonida o‘tkazildi. Eron Tashqi ishlar vazirligi vakili Ismoil Bag‘oiy Vashingtonning iqtisodiy bosimini keskin tanqid qildi.

 
Maʼlumotlarga ko‘ra, yangi ko‘ngillilarni safarbar qilish kampaniyasi AQSH va Isroilning Eronga qarshi hujumlari kuchaygan davrda, aprel oyida boshlangan. Eron rasmiylari potensial safarbarlik uchun 30 milliondan ortiq odam ro‘yxatdan o‘tganini bildirgan.