Ovqatdan zaharlanish gumoni: kasalxonaga yotqizilganlar soni 57 nafarga yetdi
Farg‘onada fastfud mahsulotlari tayyorlaydigan shoxobcha faoliyati vaqtincha to‘xtatildi.
Farg‘ona viloyati Uchko‘prik tumanida 17–18-sentabr kunlari holsizlik, ko‘ngil aynishi va ich ketishi kabi shikoyatlar bilan fuqarolar tibbiy yordam so‘rab murojaat qilgan.
18-sentabr soat 20:00 holatiga ko‘ra, 57 nafar fuqaro tibbiy yordam so‘ragan va ularning barchasi shifoxonaga yotqizilgan. Bemorlar orasida og‘ir yoki reanimatsion holatdagi fuqarolar yo‘q.
Dastlabki epidemiologik surishtiruv davomida murojaat qilgan fuqarolarning Uchko‘prik tumani Navro‘zshoh ko‘chasida joylashgan fastfud mahsulotlari tayyorlaydigan shoxobchalardan birida xot-dog va non-burger isteʼmol qilgani aniqlangan.
Shifokorlar tomonidan bemorlarda ovqatdan zaharlanish holati gumon qilinmoqda.
Holat yuzasidan epidemiologik surishtiruv ishlari davom etmoqda. Tadbirkorlik subyektining faoliyati esa qonunchilikda belgilangan tartibda vaqtincha to‘xtatilgan.
