Resursdan tayyor mahsulotgacha: Qoraqalpog‘istonda yangi sanoat va investitsiya xaritasi yaratiladi
Uch yilda 1,5 ming yuqori daromadli ish o‘rni yaratish va raqamli texnologiyalar eksportini 600 million dollarga yetkazish rejalashtirilmoqda.
Shavkat Mirziyoyev Qoraqalpog‘istonda mavjud tabiiy va energetik salohiyatdan samarali foydalanish, yangi sanoat tarmoqlarini rivojlantirish bo‘yicha vazifalarni belgilab berdi.
Davlat rahbari hududda yer, qazilma boyliklar, quyosh va shamol energiyasi, shuningdek, katta yaylovlar mavjudligini qayd etdi.
Ushbu imkoniyatlardan kelib chiqib, “resursdan tayyor mahsulotgacha” bo‘lgan zanjirni qamrab oluvchi yangi sanoat va investitsiya xaritasi yaratiladi.
Shuningdek, “Qo‘ng‘irot–Qorao‘zak–Taxiatosh” yo‘nalishi Qoraqalpog‘istonning “yashil sanoat yo‘lagi” hamda “intellektual iqtisodiyot uchburchagi”ga aylantiriladi.
Sun’iy intellekt va data-markaz loyihalarini amalga oshirish uchun tashkil etilgan maxsus zonada umumiy qiymati 8 milliard dollarlik 6 ta loyiha amalga oshirilishi belgilandi.
Mutasaddilarga 1-oktabrgacha ushbu yo‘nalish bo‘yicha besh yillik dastur ishlab chiqish topshirildi. Unda investorlar uchun 1 gigavatt quvvatga ega barqaror elektr ta’minotini yo‘lga qo‘yish masalasiga alohida e’tibor qaratiladi.
Shuningdek, uch yil davomida Nukus shahri, Qo‘ng‘irot, Qorao‘zak va Taxiatosh hududlarida 1,5 mingta yuqori daromadli ish o‘rni yaratish vazifasi belgilandi.
Bulutli texnologiyalar va sun’iy intellekt sohasida xizmatlar eksportini rivojlantirish orqali yillik eksport hajmini 600 million dollarga yetkazish maqsad qilingan.
