Toshkentda MIB orqali madaniy buyumlar muzeyga qaytarildi
Shu tariqa ijro hujjatida belgilangan talablar to‘liq bajarilib, ijro ishi yakunlandi.
Majburiy ijro byurosining Yangihayot tuman bo‘limi ish yurituvida jinoyat ishlari bo‘yicha Sirg‘ali tuman sudining 2024 yil 2 oktyabrdagi ijro varaqasiga asosan, huquqbuzar chet el fuqarosiga oid maʼmuriy ish bo‘yicha daliliy ashyo sifatida olingan mol-mulklarni davlat daromadiga o‘tkazish to‘g‘risidagi ijro hujjati mavjud bo‘lgan.
Mazkur ijro hujjati 2024 yil 25 oktyabr kuni Byuroning Yangihayot tuman bo‘limi ish yurituviga kelib tushgan. Unga ko‘ra, daliliy ashyo sifatida olinib, 1536-sonli yuk xati asosida “Bojxona-servis” DMga vaqtincha saqlovga topshirilgan 1 dona “Kvars 2” yozuvli kinokamera, 1 dona oq rangli metall shtativ hamda 1 dona “Leningrad 2” yozuvli fotoeksponometrni belgilangan tartibda davlat daromadiga o‘tkazish nazarda tutilgan.
Sud qarorining aniqlangan holatlar qismida qayd etilganidek, O‘zbekiston Respublikasi Madaniy meros agentligi Badiiy ekspertiza boshqarmasi bosh mutaxassislari tomonidan 2024 yil 15 avgust kuni o‘tkazilgan ekspertiza natijasiga ko‘ra, mazkur ashyolar madaniy va tarixiy ahamiyatga ega ekani aniqlangan.
Amaldagi tartibga ko‘ra, tarixiy, ilmiy, badiiy va boshqa madaniy qimmatga ega bo‘lgan mol-mulklar keyinchalik davlat muzeylari hamda ilmiy muassasalarga tekin berish uchun tegishli tartibda topshiriladi.
Shundan kelib chiqib, mazkur madaniy va tarixiy ahamiyatga ega ashyolar 2026 yil 14 sentyabr kuni tegishli dalolatnoma asosida O‘zbekiston kinosanʼati muzeyiga topshirildi.
