Xorijiy hamkorlar e’tibori ortmoqda: Qoraqalpog‘istonda qator yirik loyihalarga start berildi
Saida Mirziyoyeva Qoraqalpog‘istonga tashrif davomida yangi tibbiyot akademiyasi, sanoat korxonalari va intensiv bog‘larni ko‘zdan kechirdi.
Saida Mirziyoyeva Prezident Shavkat Mirziyoyev bilan birga Qoraqalpog‘istonda amalga oshirilayotgan qator loyihalar va obyektlar bilan tanishdi.
Tashrif davomida yangi tibbiyot akademiyasi, sanoat korxonalari hamda intensiv bog‘lar ko‘zdan kechirilib, hudud aholisining bandligini ta’minlash va daromadlarini oshirish uchun yaratilayotgan imkoniyatlar bilan tanishildi.
Tashrifning asosiy voqealaridan biri energetika, sanoat, transport, tibbiyot, raqamli infratuzilma va boshqa sohalardagi qator yirik loyihalarga start berilgani bo‘ldi.
Saida Mirziyoyeva yangi loyihalarning aksariyati nufuzli xorijiy hamkorlar bilan birgalikda amalga oshirilayotganini ta’kidladi.
Uning qayd etishicha, Qoraqalpog‘istonga yo‘naltirilayotgan investitsiyalar hajmining ortishi va yangi salmoqli loyihalarning ko‘payishi xorijiy hamkorlarning O‘zbekistonga bo‘lgan ishonchi hamda e’tibori tobora ortib borayotganini ko‘rsatmoqda. Bu, shuningdek, mamlakatda tadbirkorlik va investitsiya faoliyati uchun yaratilayotgan qulay sharoitlarning amaliy natijasidir.
Saida Mirziyoyeva sarmoyalar oqimini yanada kuchaytirish, xalqaro hamkorlar safini kengaytirish hamda ko‘lami yanada yirik yangi loyihalarni ishga tushirish izchil davom ettirilishini ta’kidladi.
