Bog‘cha bolalari xavfsizligiga beparvolik: haydovchi ushlandi
Haydovchi Damas‘da 16 nafar bog‘cha bolasini olib ketayotgani aniqlangan.
Sirdaryo viloyati Guliston tumanida Damas avtomobilida 16 nafar bog‘cha tarbiyalanuvchisini olib ketayotgan haydovchi aniqlandi. Bu haqda viloyat Ichki ishlar boshqarmasi xabar berdi.
Qayd etilishicha, amaldagi yo‘l harakati qoidalariga ko‘ra, transport vositasining texnik tavsifida ko‘zda tutilgan yo‘lovchilar sonidan ortiq odam tashish taqiqlangan.
Shunga qaramay, Guliston tumani hududidan o‘tuvchi avtomobil yo‘llarida Damas rusumli transport vositasi yordamida 16 nafar bog‘cha tarbiyalanuvchisini olib ketish holati aniqlangan.
Mazkur qoidabuzarlik yuzasidan haydovchi bilan profilaktik tushuntirish ishlari olib borilgan.
Shuningdek, haydovchiga nisbatan Maʼmuriy javobgarlik to‘g‘risidagi kodeksining 128-8-moddasi asosida maʼmuriy bayonnoma rasmiylashtirilgan.
Eslatib o‘tamiz, avvalroq Toshkentda 25 nafar bog‘cha bolasini olib ketayotgan haydovchi ushlangani xabar qilingan edi.
