Italiya maktablarida xorijiy o‘quvchilar soni cheklanadi: burqa va niqob kiyish ham taqiqlanadi
Ayrim xorijlik o‘quvchilarning ota-onalariga italyan tilini o‘rganish majburiyati yuklatilishi mumkin.
Italiya hukumati maktab sinflarida xorijiy o‘quvchilar sonini cheklash hamda ta’lim muassasalarida burqa va niqob kiyishni taqiqlashni nazarda tutuvchi qonun loyihasini tayyorlamoqda. Bu haqda bosh vazir Jorja Meloni ma’lum qildi.
Uning so‘zlariga ko‘ra, yangi tartib bir sinfda bo‘lishi mumkin bo‘lgan xorijiy o‘quvchilarning maksimal sonini belgilashni nazarda tutadi. Maktab tizimiga moslashishda jiddiy qiyinchiliklarga duch kelayotgan xorijiy o‘quvchilarning ota-onalariga italyan tilini o‘rganish majburiyati ham yuklanishi mumkin.
Qonun loyihasida maktablarda yuzni to‘liq yopib turuvchi burqa va niqob kiyishni taqiqlash ham ko‘zda tutilgan.
“Maktabga yuz ochiq holda kelish kerak. Italiyada hech kim — chinakam yoki o‘ylab topilgan an’ana nomidan — yosh ayol o‘z yuzini yashirishi kerakligini belgilay olmaydi”, — dedi Meloni.
Bosh vazir bir sinfda nechta xorijiy o‘quvchiga ruxsat berilishi rejalashtirilayotganini hozircha aniq ma’lum qilmagan.
Melonining ta’kidlashicha, sinfda italyan tilini bilmaydigan o‘quvchilar soni kam bo‘lsa, ular o‘qituvchilar va sinfdoshlarining yordami bilan tezroq integratsiyalashishi mumkin. Bunday o‘quvchilar sonining ko‘pligi esa, uning fikricha, ta’lim jarayonini murakkablashtiradi.
