“Mutlaqo xavfsiz”, “nojo‘ya taʼsiri yo‘q”: Raqobat qo‘mitasi tibbiy xizmatlar reklamasi bo‘yicha ogohlantirdi

Raqobat qo‘mitasi tibbiy xizmatlar reklamasida davolash natijasini kafolatlovchi va xizmat samaradorligini bo‘rttirib ko‘rsatuvchi iboralardan foydalanish bo‘yicha tadbirkorlarni ogohlantirdi.

Qo‘mitaga ko‘ra, so‘nggi vaqtlarda tibbiy xizmatlar reklamalarida «kasallikdan bir umrga xalos qilamiz», «mutlaqo xavfsiz», «3 kunda davolaymiz», «hech qanday nojo‘ya taʼsiri yo‘q», «bizga kelgan bemorlarning barchasi sog‘ayadi» kabi iboralar qo‘llanayotgan holatlar kuzatilmoqda.

Qayd etilishicha, reklamada davolash natijasini kafolatlash, mutlaq xavfsizlikni vaʼda qilish, qarshi ko‘rsatmalarni inkor etish, bemorga muayyan natijani vaʼda qilish yoki organizmning individual xususiyatlarini hisobga olmaslik qonunchilik talablarining buzilishiga olib kelishi mumkin.

Shuningdek, tibbiy faoliyatni amalga oshirish uchun berilgan litsenziyada ko‘rsatilmagan xizmatlarni reklama qilish taqiqlanadi.

«Reklama to‘g‘risida»gi qonunning 16-moddasiga muvofiq, reklama foydalanuvchilarni chalg‘itadigan yoki chalg‘itishi mumkin bo‘lgan nomaqbul maʼlumotlarni o‘z ichiga olmasligi lozim.
Bundan tashqari, qonunning 47-moddasiga ko‘ra, nomaqbul reklama berganlik yoki aksilreklama berishni rad etganlik uchun bazaviy hisoblash miqdorining 70 baravari miqdorida jarima solinishi mumkin.

«Isteʼmolchilar huquqlarini himoya qilish to‘g‘risida»gi qonunga ko‘ra, noto‘g‘ri reklama yoki axborot oqibatida sotib olingan tovar, ish yoki xizmat sabab isteʼmolchiga yetkazilgan zarar ishlab chiqaruvchi, ijrochi yoki sotuvchi tomonidan to‘liq qoplanishi zarur.

Raqobat qo‘mitasi tibbiy xizmatlarni reklama qilayotgan tadbirkorlik subyektlarini reklamalarini amaldagi qonunchilik talablariga muvofiqlashtirishga hamda isteʼmolchilarga noto‘g‘ri va chalg‘ituvchi maʼlumotlar berishdan tiyilishga chaqirdi.

Qo‘mita tibbiy xizmatlar reklamasi sohasida monitoring ishlarini tizimli ravishda davom ettirishini maʼlum qildi.