Omonatdagi pulni o‘zlashtirish: Toshkentda bank mas’ullariga jinoyat ishi qo‘zg‘atildi
Tijorat banki mas’ullari fuqaro nomidan qalbaki hujjatlar rasmiylashtirib, uning omonatidagi 300 ming dollarni o‘zlashtirgan.
Bosh prokuratura huzuridagi Departamentning Sergeli tumani bo‘limi tomonidan o‘tkazilgan tergovga qadar tekshiruv davomida tijorat banklaridan birida fuqaroning omonatidagi mablag‘lar o‘zlashtirilgani aniqlangan.
Ma’lum bo‘lishicha, bankning mas’ul shaxslari fuqaro I.M. nomidan qalbaki ariza va boshqa hujjatlarni rasmiylashtirib, uning bankdagi 500 ming AQSh dollari miqdoridagi omonatidan 300 ming dollarni o‘zlashtirib, talon-toroj qilgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) hamda 228-moddasi (hujjatlar, shtamplar, muhrlar va blankalarni tayyorlash, qalbakilashtirish, sotish yoki ulardan foydalanish) bilan jinoyat ishi qo‘zg‘atilgan.
Hozirda ish doirasida tergov harakatlari olib borilmoqda.
