O‘rmon yong‘inlari xavfi: Fransiyaning uchta departamentida qizil daraja e’lon qilindi
Havoning quruqligi va sekundiga 15 metrgacha bo‘lgan shamol yong‘inlar tarqalishi xavfini oshirmoqda.
Mamlakat milliy meteorologiya xizmati Météo-France ma’lumotlariga ko‘ra, qizil xavf darajasi Pireney-Orientales, Od va Gard departamentlariga joriy etilgan.
Hududlarda havo harorati 34 darajagacha ko‘tarilishi kutilmoqda. Past namlik va sekundiga 15 metrgacha yetadigan shamol esa yong‘inlarning yuzaga kelishi va tez tarqalishi xavfini oshirmoqda.
Bundan tashqari, yana beshta departamentda o‘rmon yong‘inlari xavfi to‘q sariq darajaga ko‘tarilgan.
Météo-France ma’lumotlariga ko‘ra, 2026-yil Fransiyada o‘rmon yong‘inlari bo‘yicha rekord mavsumlardan biri bo‘lmoqda. Yoz davomida kamida bitta departamentda yong‘in xavfi qizil darajada bo‘lgan kunlar soni 27 taga yetgan. Shuningdek, 8-iyundan 20-avgustgacha 74 kun davomida kamida bitta departamentda yong‘in xavfi yuqori yoki juda yuqori bo‘lgan.
Météo-France qayd etishicha, yuqori harorat, yog‘ingarchilikning kamligi, tuproq va o‘simliklarning quruqligi hamda kuchli shamollar yong‘in xavfini sezilarli darajada oshirgan.
Ta’kidlanishicha, vaziyat ayrim hududlarda sentyabr oyida ham xavfli bo‘lib qolishi mumkin.
