Rossiya, Vetnam va Tailanddagi tajriba: Chirchiqda narkolaboratoriya fosh etildi
Giyohvandlik vositalarini tayyorlash va sotish bilan shug‘ullangan 4 nafar fuqaro ushlandi.
Chirchiq shahrida xonadonni ijaraga olib, giyohvandlik vositalarini tayyorlash va sotish bilan shug‘ullangan 4 nafar fuqaro ushlandi.
Maʼlum qilinishicha, tezkor tadbir DXXning Toshkent viloyati bo‘yicha boshqarmasi hamda viloyat IIBB xodimlari hamkorligida o‘tkazilgan.
Aniqlanishicha, 2000 va 2002 yillarda tug‘ilgan shaxslar “Telegram” messenjeridagi xorijlik kuratorlari tomonidan kontrabanda yo‘li bilan yetkazib berilgan «gashish moyi» va yarim tayyor mahsulotlarni qayta ishlab, “gashish” giyohvandlik vositasini tayyorlashgan.
Xonadon ko‘zdan kechirilganda, taxminiy og‘irligi 400 gramm bo‘lgan “gashish”, 5 kg yarim tayyor mahsulot, shuningdek, narkotik moddalarni tayyorlash va quritishda foydalanilgan elektr pech, mikser, tarozi, qo‘lqoplar, himoya vositalari hamda yelim idishlar ashyoviy dalil sifatida olingan.
Tergovga qadar o‘tkazilgan tekshiruv davomida gumonlanuvchilardan bir nafari avval Rossiyada, yana ikki nafari esa Vetnam va Tailandda laboratoriya sharoitida narkotik moddalar tayyorlash bilan shug‘ullangani aniqlangan.
Holat yuzasidan ularga nisbatan Jinoyat kodeksining 276¹-moddasi 3-qismi “a” va “b” bandlari bilan jinoyat ishi qo‘zg‘atilgan. Hozirda tergov harakatlari olib borilmoqda.
