Yaqin Sharqdagi keskinlik: AQSH fuqarolarini ogohlantirdi
AQSH elchixonalarining ogohlantirishi Yamandagi husiylar va Saudiya Arabistoni o‘rtasidagi qarama-qarshilik kuchayishi ehtimoli fonida berildi.
AQSHning Yaqin Sharqdagi diplomatik vakolatxonalari mintaqadagi xavfsizlik vaziyati keskinlashishi mumkinligidan ogohlantirib, Amerika fuqarolarini ehtiyotkor bo‘lishga chaqirdi.
19-sentyabr kuni AQSHning Bahrayn, Isroil, Iroq, Iordaniya, Quvayt, Livan, Ummon, Qatar, Saudiya Arabistoni va BAAda faoliyat yurituvchi elchixonalari hamda diplomatik vakolatxonalari tegishli ogohlantirishlarni eʼlon qilgan.
AQSHning Livandagi elchixonasi fuqarolarga hushyor bo‘lishni, shuningdek, ehtimoliy reyslarning bekor qilinishi, havo hududlarining yopilishi va transport qatnovlaridagi uzilishlar haqidagi maʼlumotlardan xabardor bo‘lib turishni tavsiya qilgan.
Diplomatik vakolatxonalar mintaqadagi vaziyat “murakkab”ligicha qolayotganini va harbiy mojaro tez surʼatlarda kuchayishi mumkinligini qayd etgan.
Ogohlantirishlar Yamandagi husiylar harakati va Saudiya Arabistoni o‘rtasidagi qarama-qarshilik kuchayishi ehtimoli ortidan yangragan.
Husiylar shanba kuni Saudiya Arabistonidagi nishonlarga ballistik va qanotli raketalar hamda dronlar yordamida hujumlar uyushtirilganini maʼlum qilgan. Ularning bayonotiga ko‘ra, hujumlardan biri Ar-Riyoddagi nishonlarga, ikkinchisi esa Yanbu shahridagi Saudi Арамсо obyektlariga qaratilgan.
Saudiya Arabistoni boshchiligidagi koalitsiya vakili esa qirollik havo mudofaasi Ar-Riyod tomon uchirilgan ballistik raketani tutib qolganini bildirgan. Shuningdek, Baysh, Toif, Farason va Yanbu shaharlari ham hujumlarga uchragani aytilgan.
Mintaqadagi keskinlik fonida AQSH diplomatik vakolatxonalari fuqarolardan xavfsizlik choralariga rioya qilish va transport qatnovlaridagi ehtimoliy o‘zgarishlarga tayyor turishni so‘ragan.
