5 mlrd dollar ajratiladi: AQSH Yaqin Sharq energetikasini tiklashni taklif qildi
Umumiy qiymati 10 mlrd dollarga yetishi mumkin bo‘lgan fond Hurmuz bo‘g‘oziga neft va gaz tashishda qaramlikni kamaytiruvchi infratuzilmani rivojlantirishga ham yo‘naltiriladi.
AQSH maʼmuriyati Yaqin Sharqda urushdan zarar ko‘rgan energetika infratuzilmasini tiklashga ko‘maklashuvchi yangi fondga 5 mlrd dollar ajratishni taklif qildi. Bu haqda The Wall Street Journal AQSH va mintaqa rasmiylari hamda hujjatlarga tayanib xabar berdi.
Taklif etilayotgan fondning umumiy hajmini 10 mlrd dollarga yetkazish rejalashtirilmoqda. Buning uchun AQSH sakkizta mintaqaviy hamkoridan — Saudiya Arabistoni, BAA, Qatar, Bahrayn, Quvayt, Ummon, Iroq va Iordaniyadan — yana 5 mlrd dollar miqdorida mablag‘ jalb qilishni ko‘zlamoqda.
Fond mablag‘lari Yaqin Sharqdagi shikastlangan neft va gaz infratuzilmasini qayta tiklash bilan birga, energiya eksportining Hurmuz bo‘g‘oziga qaramligini kamaytiradigan muqobil yo‘nalishlar va infratuzilmani rivojlantirishga yo‘naltirilishi mumkin.
WSJ maʼlumotlariga ko‘ra, fondni AQSH Xalqaro taraqqiyot moliya korporatsiyasi (DFC) boshqarishi rejalashtirilmoqda. Biroq yangi fond bo‘yicha muzokaralar davom etmoqda va uning shartlari o‘zgarishi mumkin. Qaysi davlatlar yakunda kelishuvga qo‘shilishi ham hozircha aniq emas.
Nashr ushbu tashabbusni yetti oy davom etgan Eron urushi ortidan mintaqaning energetika infratuzilmasiga yetkazilgan zarar va global energiya bozoridagi uzilishlarga javob sifatida baholagan. WSJ maʼlumotlariga ko‘ra, mojaro davomida mintaqadagi neftni qayta ishlash zavodlari, quvurlar va boshqa energetika obyektlari zarar ko‘rgan.
Shuningdek, Fors ko‘rfazi davlatlari neft eksporti uchun Hurmuz bo‘g‘oziga muqobil yo‘nalishlarni yaratish ustida ish olib bormoqda. Biroq ekspertlar bunday infratuzilmani qisqa muddatda barpo etish murakkab bo‘lishi mumkinligini taʼkidlamoqda.
Reuters AQSHning 5 mlrd dollarlik taklifi haqidagi WSJ xabarini hozircha mustaqil ravishda tasdiqlay olmaganini maʼlum qildi.
