Kuzovni ko‘tarish qimmatga tushdi: Qashqadaryodan Samarqandga elektr uzatuvchi tarmoq o‘chdi
Uning o‘chishi Buxoro viloyatidagi shamol elektr stansiyalarining ishlab chiqarish quvvatiga ham taʼsir ko‘rsatgan.
21-sentyabr kuni soat 11:18 da yuk avtomobili chiqindi to‘kish maqsadida kuzovini ko‘targan vaqtida Qashqadaryo viloyatidan Samarqand viloyatiga elektr energiyasi uzatuvchi 500 kV kuchlanishli “L-527” elektr uzatish tarmog‘iga tegib ketgan. Natijada tarmoq avariyaviy o‘chgan.
Energetika vazirligi xabariga ko‘ra, mazkur tarmoq yagona 500 kVli elektr uzatish tizimi zanjirining bir qismi hisoblanadi. Uning o‘chishi Buxoro viloyatidagi shamol elektr stansiyalarining ishlab chiqarish quvvatiga ham taʼsir ko‘rsatgan. Natijada ushbu stansiyalarning ishlab chiqarish hajmi 270 MVtga kamaygan.
Energetika tizimidagi avariyaga qarshi himoya tizimlari o‘z vaqtida ishga tushib, yirik nosozliklarning oldi olingan. Zaxira quvvatlardan foydalanilgani sababli avariya isteʼmolchilarning elektr taʼminotiga taʼsir ko‘rsatmagan.
Energetiklar tomonidan zarur choralar ko‘rilib, nosozlik soat 11:37 da bartaraf etilgan va elektr uzatish tarmog‘i qayta ishga tushirilgan.
Energetiklar voqea joyiga yetib kelganida, yuk avtomobili haydovchisi u yerda bo‘lmagan.
Hodisa yuzasidan haydovchining xatti-harakatlariga huquqiy baho berish uchun tegishli hujjatlar huquqni muhofaza qiluvchi organlarga taqdim etilgan.
