Maktabdagi otishma: Turkiyada 10 kishi yaralandi
15 yoshli o‘quvchi miltiq bilan maktab oldiga borib, otishma uyushtirgan.
Turkiyaning Manisa viloyati Turgutlu shahridagi İnci Üzmez Mesleki ve Teknik Anadolu Lisesi oldida otishma sodir bo‘ldi. Hodisa oqibatida 10 nafar o‘quvchi yaralangan, ulardan birining ahvoli og‘ir ekani xabar qilingan.
Mahalliy vaqt bilan soat 08:00 atrofida yuz bergan hodisada gumondor maktab oldiga ov miltig‘i bilan kelib, o‘q uzgan. Dastlabki maʼlumotlarga ko‘ra, u bir kun avval maktabda janjallashgan o‘quvchilarni nishonga olgan.
Mahalliy nashrlar gumondor 2011-yilda tug‘ilgan, 9-sinfda o‘qiydigan 15 yoshli o‘quvchi ekanini yozmoqda. U otishmadan so‘ng voqea joyidan qochgan, biroq huquq-tartibot xodimlari tomonidan ushlangan.
Jarohatlanganlar Turgutlu davlat shifoxonasiga olib ketilgan. Voqea joyiga ko‘plab politsiya va tibbiyot xodimlari yuborilgan.
Manisa viloyati gubernatorligining dastlabki maʼlumotiga ko‘ra, hodisa oqibatida 8 kishi jabrlangan. Keyingi xabarlarda esa yaradorlar soni 10 nafarga yetgani qayd etilgan.
Hodisa yuzasidan tergov olib borilmoqda.
