O‘quvchilar eshakda maktabga qatnamoqda: MMTB izoh berdi

Ijtimoiy tarmoqlarda Samarqand viloyati Kattaqo‘rg‘on tumanidagi o‘quvchilar eshakda maktabga qatnayotgani aks etgan video tarqaldi.

Samarqand viloyati Maktabgacha va maktab taʼlimi boshqarmasi maʼlum qilishicha, videodagi holat Mavlonsoy qishlog‘ida emas, balki tuman markazidan 40 kilometr uzoqlikda joylashgan Burgansoy MFYning Olmosuvon qishlog‘idagi 84-sonli umumiy o‘rta taʼlim maktabida sodir bo‘lgan.

Qayd etilishicha, ushbu hudud Qo‘shrabot tumani bilan chegaradosh bo‘lib, tog‘ yonbag‘irlarida joylashgan kichik va tarqoq qishloqlardan iborat. Hududdagi ichki yo‘llar asosan so‘qmoqlardan tashkil topgan.

Ayni paytda maktabning asosiy binosida 92 nafar, filialida esa 21 nafar o‘quvchi tahsil olmoqda. Filial va asosiy bino o‘rtasidagi masofa 3 kilometrni, asosiy binoga qatnaydigan eng uzoq masofa esa 4 kilometrni tashkil etadi.

5–11-sinflarda jami 74 nafar o‘quvchi tahsil oladi. Ularning 45 nafari Olmosuvon qishlog‘idan, 13 nafari Qo‘shamazor qishlog‘idan, 17 nafari To‘lali va 17 nafari Jilqihaydar qishloqlaridan asosiy maktab binosiga qatnaydi.

Boshqarma maʼlumotiga ko‘ra, tog‘li hudud va aholi punktlarining tarqoq joylashgani sababli mahalliy aholining aksariyati, jumladan, o‘quvchilar ham kundalik harakatlanishda eshaklardan foydalanadi.

Hozirda mutasaddi tashkilotlar tomonidan olis va tog‘li hududlarda o‘quvchilarning maktabga xavfsiz va qulay qatnovini taʼminlash, shuningdek, yo‘l infratuzilmasini yaxshilash bo‘yicha tegishli chora-tadbirlar rejasi ishlab chiqilmoqda.