XDP Toshkentdagi jamoat transporti tariflari bo‘yicha o‘z pozitsiyasini bildirdi

O‘zbekiston Xalq demokratik partiyasi Toshkent shahrida jamoat transporti tariflarini qayta ko‘rib chiqish va maktab o‘quvchilarining xavfsiz qatnovini taʼminlash masalalari yuzasidan o‘z pozitsiyasini bildirdi. Partiya tariflarni belgilashda tashuvchilarning xarajatlari bilan bir qatorda aholi daromadlari, oilaviy xarajatlar, o‘quvchilar va talabalarning kundalik qatnovi, kam daromadli hamda ko‘p farzandli oilalarning imkoniyatlarini ham hisobga olish zarurligini taʼkidladi.

Maʼlum qilinishicha, Toshkentda avtobus va metroda bir martalik elektron to‘lov tarifini qariyb 47 foizga oshirish taklifi jamoatchilik muhokamasiga qo‘yilgan. Shu bilan birga, maktab o‘quvchilarining xavfsiz va qulay qatnovini taʼminlash maqsadida shaharda School Bus tizimini joriy etish imkoniyatlari o‘rganilmoqda. XDP maʼlumotiga ko‘ra, o‘tkazilgan so‘rovda qatnashganlarning 73,5 foizi ushbu taklifni qo‘llab-quvvatlagan.

Partiya o‘quvchilar uchun alohida va imtiyozli tarif mexanizmini joriy etishni maqsadga muvofiq deb hisoblaydi. Xususan, barcha o‘quvchilar uchun imtiyozli tarif, ijtimoiy himoyaga muhtoj va ko‘p farzandli oilalar farzandlari uchun esa qo‘shimcha qo‘llab-quvvatlash mexanizmlarini yaratish taklif qilinmoqda.

XDP, shuningdek, School Bus tizimi ota-onalar zimmasiga qo‘shimcha moliyaviy yuk bo‘lmasligi kerakligini bildirdi. Partiya xorijiy tajribada o‘quvchilar transport xarajatlarini kamaytirish uchun chegirmalar, shuningdek, oila daromadi va maktabgacha bo‘lgan masofaga qarab xarajatlarni to‘liq yoki qisman qoplash kabi mexanizmlar qo‘llanilishini qayd etdi.

Partiya tariflardagi o‘zgarishlarning ijtimoiy taʼsiri ochiq va xolis baholanishi, qarorlar jamoatchilikka tushunarli asoslar bilan izohlanishi hamda o‘quvchilar uchun samarali imtiyozlar va oilalarni qo‘llab-quvvatlash mexanizmlari yaratilishi zarurligini bildirdi.