200 ming dollargacha: pul mukofotlari miqdori oshirildi
Xalqaro nufuzli shaxmat musobaqalarida g‘olib va sovrindor bo‘lgan o‘zbekistonlik shaxmatchilar hamda ularning trenerlari uchun bir martalik pul mukofotlari ko‘paytirildi.
O‘zbekistonda xalqaro nufuzli shaxmat musobaqalari g‘oliblari va sovrindorlari hamda ularning murabbiylariga beriladigan bir martalik pul mukofotlari miqdori oshirildi. Bu Prezidentning 2026-yil 21-sentabrdagi qarorida belgilangan.
“Xalqaro nufuzli shaxmat musobaqalari g‘oliblari va sovrindorlari hamda ularning trenerlarini munosib rag‘batlantirish chora-tadbirlari to‘g‘risida”gi qaror (PQ–346-son) bilan shaxmatchilar va ularning murabbiylari uchun yangi mukofot miqdorlari tasdiqlandi.
Yangi tartibga ko‘ra, kattalar o‘rtasidagi Butunjahon shaxmat olimpiadasi va paralimpiadasida g‘olib bo‘lgan shaxmatchiga 200 ming dollar, uning murabbiyiga esa 50 ming dollar beriladi.
Kumush medal sohibiga 100 ming dollar, murabbiyiga 25 ming dollar, bronza medal sohibiga esa mos ravishda 50 ming va 12,5 ming dollar miqdorida mukofot beriladi.
Yoshlar o‘rtasidagi Butunjahon shaxmat olimpiadasi va paralimpiadasi g‘oliblari uchun shaxmatchiga 20 ming dollar, murabbiyiga 5 ming dollar mukofot belgilanadi. Kumush medal uchun mos ravishda 10 ming va 2,5 ming dollar, bronza medal uchun esa 5 ming va 1,25 ming dollar ajratiladi.
FIDE tasnifiga ko‘ra, jahon miqyosidagi musobaqalar g‘oliblari uchun shaxmatchilarga 15 ming dollargacha, murabbiylarga esa 7 ming dollargacha mukofot beriladi.
Osiyo miqyosidagi musobaqalarda ushbu miqdorlar shaxmatchilar uchun 10 ming dollargacha, murabbiylar uchun esa 5 ming dollargacha etib belgilangan.
Shuningdek, xalqaro grossmeyster sport unvonini olgan shaxmatchiga 5 ming dollar miqdorida bir martalik pul mukofoti beriladi.
Qaror bilan tasdiqlangan yangi mukofot miqdorlari AQSh dollarida belgilangan.
