Mojaro qishdan oldin tugashi mumkin — Tramp
AQSH prezidenti Rossiya va Ukraina rahbarlari bilan yaqindan ishlayotganini ma’lum qilib, mojaro bo‘yicha kelishuvga erishilishiga umid bildirdi.
Donald Tramp Ukraina mojarosi bo‘yicha kelishuvga erishilishiga umid bildirdi. U Rossiya va Ukraina rahbarlari bilan muzokaralar olib borilayotganini va jarayon ko‘pchilik kutganidan tezroq yakunlanishi mumkinligini aytdi.
Tramp bu haqda 22-sentabr kuni Nyu-Yorkda BMT Bosh Assambleyasining 81-sessiyasi doirasida Ukraina prezidenti Vladimir Zelenskiy bilan uchrashuvi chog‘ida ma’lum qildi.
Zelenskiy uchrashuv vaqtida Trampning Rossiya bilan mojaroni imkon qadar tezroq yakunlashga yordam berishiga umid bildirdi. Ukraina prezidenti buni qish kelishidan oldin amalga oshirish kerakligini ta’kidlagan.
Bunga javoban Tramp “Qishdan oldin jiddiy bir narsa sodir bo‘ladi”, degan.
AQSh prezidenti BMT Bosh Assambleyasidagi nutqida ham Rossiya va Ukraina rahbarlari bilan yaqindan hamkorlik qilayotganini aytgan.
“Biz Rossiya va Ukraina rahbarlari bilan juda yaqindan hamkorlik qilmoqdamiz. Va biz buni amalga oshiramiz. Bu amalga oshadi. Menimcha, bu ko‘pchilik o‘ylaganidan tezroq sodir bo‘ladi”, — degan Tramp.
Shu bilan birga, hozircha Rossiya va Ukraina o‘rtasida tinchlik kelishuviga erishilgani haqida ma’lumot yo‘q. Tomonlar o‘rtasidagi harbiy harakatlar davom etmoqda. AQSh va boshqa davlatlar vositachiligidagi diplomatik sa’y-harakatlar esa davom etmoqda.
Sentabr boshida Trampning maxsus vakili Stiv Uitkoff va uning kuyovi Jared Kushner Moskva hamda Kiyevga tashrif buyurib, mojaroni yakunlash bo‘yicha muzokaralar o‘tkazgan edi. Kushner keyinchalik uch tomonlama muzokaralarga qaytish imkoniyati muhokama qilinganini bildirgan.
