2,45 mlrd dollarlik reja: Trampning Tinchlik kengashi G‘azoni tiklash dasturini taqdim etdi

 

AQSh prezidenti Donald Tramp tashabbusi bilan tuzilgan Tinchlik kengashi G‘azo sektorini tiklash bo‘yicha dastlabki olti oylik rejani taqdim etdi. 66 ta loyihani o‘z ichiga olgan dastur uchun 2,45 milliard dollar kerak bo‘ladi.

 

Reja BMT Bosh Assambleyasi doirasida Nyu-Yorkda o‘tkazilgan yig‘ilishda taqdim etildi. Unda G‘azodagi infratuzilmani tiklash, ta’lim va sog‘liqni saqlash tizimini qo‘llab-quvvatlash, iqtisodiy faoliyatni qayta yo‘lga qo‘yish hamda xavfsizlikni ta’minlashga qaratilgan loyihalar o‘rin olgan.

 

Dastlabki bosqichda vayronalarni tozalash, portlamagan o‘q-dorilarni zararsizlantirish, vaqtinchalik boshpanalar qurish, shifoxonalarni ta’mirlash, elektr va suv ta’minotini tiklash, yo‘llar hamda chegara o‘tish punktlarini qayta tiklash ko‘zda tutilgan. Shuningdek, xalqaro barqarorlashtirish kuchlarini joylashtirish va yangi G‘azo politsiyasini tayyorlash bilan bog‘liq loyihalar ham mavjud.

 

Tinchlik kengashi G‘azoni to‘liq qayta tiklash ko‘proq mablag‘ talab qilishini qayd etgan. Rejaga ko‘ra, hududdagi jismoniy infratuzilmani o‘rta muddatda tiklash qiymati 35,2 milliard dollar, keyingi o‘n yillikdagi to‘liq tiklanish ehtiyoji esa 71,4 milliard dollarga baholanmoqda.

 

Kengash ma’lumotiga ko‘ra, donor davlatlar tomonidan avval 17 milliard dollar mablag‘ va’da qilingan, biroq hozirgacha uning 280 million dollari o‘tkazilgan. Shu sababli tashkilot xalqaro hamkorlarni dastlabki loyihalarni moliyalashtirishga chaqirmoqda.

 

Tinchlik kengashi vakillari dastur amalga oshirilishida bir qator muammolar mavjudligini ham tan olgan. Jared Kushner reja turli masalalar sabab kechikishlarga duch kelayotganini aytgan. Kengashning G‘azodagi loyihalarni amalga oshirishi Isroil va Hamasning kelishuvlarni bajarishi, shuningdek, xavfsizlik va boshqaruv masalalaridagi kelishuvlarga bog‘liq bo‘lib qolmoqda.