“60 mlrd so‘mlik tender” vaʼdasi: tadbirkordan 20 ming dollar olayotganlar ushlandi
Zangiotada uch kishi tadbirkorga IIVga qarashli 4 ta davlat maktabgacha taʼlim tashkilotida 60 mlrd so‘mlik qurilish va rekonstruksiya ishlarini olib berishni vaʼda qilib, pul talab qilgan.
Zangiota tumanida tadbirkorga 60 mlrd so‘mlik qurilish va rekonstruksiya ishlarini olib berishni vaʼda qilib, undan pul olgan uch kishi ushlandi.
Bosh prokuratura huzuridagi Departamentning Zangiota tumani bo‘limi va boshqa huquqni muhofaza qiluvchi organlar xodimlari hamkorligida tadbirkorlik subyektlarini huquqiy himoya qilishga qaratilgan tezkor tadbir o‘tkazildi.
Unda uch fuqaro o‘zaro til biriktirib, “S.S.” MCHJ rahbari M.N.ga 100 ming AQSH dollari evaziga yuqori lavozimlarda ishlovchi tanishlari orqali IIVga qarashli 4 ta davlat maktabgacha taʼlim tashkilotida 60 mlrd so‘mlik rekonstruksiya va qurilish ishlarini olib berishni vaʼda qilgani aniqlangan.
Ular mazkur mablag‘ning 20 ming AQSH dollarini firibgarlik yo‘li bilan olayotgan vaqtida ashyoviy dalillar bilan ushlangan.
Holat yuzasidan Jinoyat kodeksining 168-moddasi hamda 28, 211-moddasi bilan jinoyat ishi qo‘zg‘atilgan.
Hozirda tergov harakatlari olib borilmoqda.
