Qirg‘izistonda prezidentlik saylovi: ovoz berish sanasi ma’lum bo‘ldi
Saylov qonunchiligiga ko‘ra, ovoz berish yanvar oyining to‘rtinchi chorshanbasida o‘tkaziladi.
Qirg‘iziston Jogorku Keneshi navbatdagi prezidentlik saylovini 2027-yil 27-yanvarda o‘tkazish to‘g‘risida qaror qabul qildi. Qaror 24-sentabr kuni parlament majlisida ma’qullandi.
Amaldagi saylov qonunchiligiga ko‘ra, navbatdagi prezidentlik saylovi prezident vakolat muddati tugaydigan yilning yanvar oyidagi to‘rtinchi chorshanbasida o‘tkaziladi. 2027-yilda ushbu sana 27-yanvarga to‘g‘ri keladi.
Saylovoldi jarayonlari saylov sanasi rasman belgilanganidan so‘ng boshlanadi. Saylovoldi tashviqoti esa barcha nomzodlarni ro‘yxatga olish muddati yakunlangach boshlanib, ovoz berishdan 24 soat oldin to‘xtatiladi.
Qirg‘iziston qonunchiligiga ko‘ra, prezidentlikka kamida 35 yoshga to‘lgan, davlat tilini biladigan va mamlakatda jami kamida 15 yil yashagan fuqaro nomzod bo‘lishi mumkin. Nomzod xorijiy davlat fuqaroligiga ega bo‘lmasligi kerak.
Shuningdek, 2026-yilda saylov qonunchiligiga kiritilgan o‘zgartirishlar bilan prezidentlik saylovlarini o‘tkazish tartibiga qator yangiliklar kiritildi. Jumladan, saylov kuni chorshanbaga to‘g‘ri keladi va dam olish kuni hisoblanadi. Nomzodlar uchun saylov fondini oldindan shakllantirish hamda saylovchilar imzosini qog‘oz bilan bir qatorda raqamli shaklda to‘plash imkoniyati joriy etilgan.
