Surxondaryoda MIB orqali bola onasi bag‘riga qaytdi
Ijro hujjatiga asosan, bolani ona tarbiyasiga olib berish belgilangan edi.
Angor tumanida sud hujjati ijrosi taʼminlanib, bir necha oydan buyon ona mehridan uzoqda bo‘lgan voyaga yetmagan farzand onasi bag‘riga qaytarildi.
Fuqarolik ishlari bo‘yicha Sherobod tumanlararo sudining ijro hujjatiga asosan, bolani ona tarbiyasiga olib berish belgilangan edi. Biroq qarzdor ota sud hujjati talablarini ixtiyoriy bajarishdan bo‘yin tovlab, farzandini yashirib kelgan.
Majburiy ijro byurosi Angor tuman bo‘limi davlat ijrochilari tomonidan olib borilgan qidiruv tadbirlari natijasida bolaning qayerdaligi aniqlanib, uni onasi tarbiyasiga olib berish taʼminlandi.
Farzandi bilan qayta diydor ko‘rishgan ona ko‘z yoshlarini yashira olmadi. Ona bag‘riga qaytarilgan bolaning ham onasi bilan birga ekanidan xursandligi uning chehrasida aks etdi.
Shu tariqa, sud hujjati ijrosi taʼminlanib, farzand ona mehri va bag‘riga qaytarildi.
