Toshkentda MIB orqali tarixiy kitoblar davlatga qaytarildi
Ekspertiza natijasiga ko‘ra, ushbu kitoblar madaniy va tarixiy ahamiyatga ega ekani aniqlangan.
Majburiy ijro byurosining Yangihayot tuman bo‘limi ish yurituvida bo‘lgan jinoyat ishlari bo‘yicha Toshkent tuman sudining 2025 yil 3 fevraldagi ijro varaqasiga asosan, huquqbuzar fuqaroga oid ish bo‘yicha olib qo‘yilgan, umumiy qiymati 20 million so‘m bo‘lgan 2 dona kitobni davlat daromadiga o‘tkazish belgilangan.
Mazkur ijro hujjati 2025 yil 19 sentyabr kuni Byuroning Yangihayot tuman bo‘limi ish yurituviga kelib tushgan.
Sud qarorida qayd etilganidek, O‘zbekiston Respublikasi Madaniy meros agentligi Badiiy ekspertiza boshqarmasi bosh mutaxassislari tomonidan 2024 yil 26 dekabr kuni o‘tkazilgan ekspertiza natijasiga ko‘ra, ushbu kitoblar madaniy va tarixiy ahamiyatga ega ekani aniqlangan.
Qonunchilik talablariga muvofiq, tarixiy, ilmiy, badiiy va boshqa madaniy qimmatga ega bo‘lgan mol-mulklar davlat muzeylari hamda ilmiy muassasalarga tekin berish uchun tegishli tartibda topshiriladi.
Shundan kelib chiqib, mazkur kitoblar 2026 yil 14 sentyabr kuni tegishli dalolatnoma asosida O‘zbekiston Islom sivilizatsiyasi markaziga topshirildi.
