600 mln so‘mlik kredit evaziga 12 ming dollar: prokuror yordamchisi ushlandi
Mansabdor shaxs fuqaroning avtomobil oldi-sotdisi masalasini hal qilish va imtiyozli kredit olishiga ko‘maklashish evaziga pul talab qilgan.
Toshkent viloyati Oqqo‘rg‘on tumani prokurori yordamchisining noqonuniy harakatiga chek qo‘yildi. Bu haqda Davlat xavfsizlik xizmati ma’lum qildi.
Qayd etilishicha, DXX xodimlari tomonidan Bosh prokuraturaning Shaxsiy xavfsizlik boshqarmasi bilan hamkorlikda korrupsiyaga qarshi kurashish yo‘nalishida tezkor tadbir o‘tkazilgan.
Unga ko‘ra, prokuror yordamchisi xizmat mavqeidan foydalanib, fuqaroning avtomobil oldi-sotdisi bilan bog‘liq masalasini hal qilish hamda bankdan 600 mln so‘m miqdorida imtiyozli kredit olishiga ko‘maklashish evaziga jami 12 ming AQSH dollari talab qilgan.
Tezkor tadbir davomida mansabdor shaxs so‘ralgan pulning 4700 dollarini olayotgan vaqtida ashyoviy dalillar bilan ushlangan.
Tergovga qadar tekshiruv jarayonida uning bundan avval ham mazkur fuqarodan 1300 AQSH dollari olgani aniqlangan.
Hozirda holat yuzasidan unga nisbatan jinoyat ishi qo‘zg‘atish chorasi ko‘rilmoqda.
