Eron-AQSh muzokaralari: Tehron kelishuvga tayyorligini ma’lum qildi

 

Eron AQShdagi 2026-yil noyabr oyida bo‘lib o‘tadigan oraliq saylovlarni hisobga olmayapti va mamlakatning har qanday qonuniy hukumati bilan kelishuvga erishishga tayyor. Bu haqda Eron prezidenti Masud Pezeshkian Fox News telekanaliga bergan intervyusida ma’lum qildi.

 

Uning so‘zlariga ko‘ra, Tehron o‘z qarorlarini AQShdagi saylovlar bilan bog‘lamayapti.

 

«Agar hozirgi Amerika hukumati xalqaro huquq doirasida kelishuvga erishmoqchi bo‘lsa, unda davom eting. Agar bu saylovlardan oldin yoki keyin bo‘lsa, buning biz uchun qanday farqi bor?» — degan Pezeshkian.

 

Prezident Eron AQSh bilan kelishuvga erishishga tayyorligini ham ta’kidlagan. Uning qayd etishicha, Tehron iyun oyida Vashington bilan imzolangan kelishuv asosida muzokaralarni davom ettirishga tayyor.

 

«Biz sizning prezidentingiz bilan kelishuvga erishdik, u imzolandi. Shunga asoslanib, oldinga siljishga tayyormiz», — degan u.

 

Pezeshkian Eron urushni boshlamaganini va mojaro Tehronga majburan yuklanganini ta’kidlagan. Shu bilan birga, u Eron jangovar harakatlarni davom ettirishdan manfaatdor emasligini, biroq o‘zini qat’iy himoya qilishini bildirgan.

 

«Biz urushni tanlamadik. Urush bizga majburan yuklandi. Biz urush izlamaymiz», — degan Eron prezidenti.

 

U Eron-AQSh mojarosi yil oxirigacha yakunlanishi mumkinligi haqidagi savolga aniq javob bermagan. Pezeshkianning ta’kidlashicha, urushni tugatish bo‘yicha qarorni AQShning o‘zi qabul qilishi kerak.

 

Eron prezidenti, shuningdek, davlatlar o‘rtasidagi muammolarni muloqot orqali hal qilish mumkinligini qayd etgan.

 

Avvalroq AQSh prezidenti Donald Tramp BMT Bosh Assambleyasidagi nutqida Eron bilan kelishuvga erishish yoki mamlakatni yo‘q qilish masalasi oldida turganini bildirgan va tinchlik kelishuviga umid qilayotganini aytgan edi.