Kaspiydagi fojia: bedarak yo‘qolgan ikki harbiyning jasadi topildi
17 harbiy xizmatchi bilan yuz bergan fojia ortidan olib borilgan qidiruv-qutqaruv ishlari yakunlandi.
Qozog‘istonda Kaspiy dengizida bedarak yo‘qolgan ikki harbiy xizmatchining jasadi topildi. Bu haqda Qozog‘iston Respublikasi Mudofaa vazirligi ma’lum qildi.
Qayd etilishicha, 25-sentyabr kuni soat 09:15 atrofida davom etayotgan qidiruv-qutqaruv ishlari davomida bedarak yo‘qolgan ikki harbiy xizmatchi — serjant Mansur Gumarov va matros Miras Turdibekulining jasadlari topilgan.
Shu bilan Kaspiy dengizi hududida o‘tkazilgan qidiruv-qutqaruv operatsiyasi yakunlangan.
Eslatib o‘tamiz, fojia harbiy o‘quv-jangovar vazifani bajarish vaqtida ob-havoning keskin yomonlashishi oqibatida yuz bergan. Natijada 17 nafar harbiy xizmatchi ochiq dengizga yuborilgan. Ulardan 3 nafari qutqarilgan, 14 nafari halok bo‘lgan.
Qozog‘iston Mudofaa vazirligi va Qurolli kuchlari rahbariyati hamda xodimlari halok bo‘lgan harbiy xizmatchilarning oila a’zolari va yaqinlariga chuqur hamdardlik bildirgan.
Ta’kidlanishicha, halok bo‘lgan harbiy xizmatchilarning oilalariga, jumladan, moddiy va psixologik yordam ko‘rsatiladi.
