Ustoz qadrini eslatgan “Dars”: kinoteatrlarda qo‘ng‘iroq chalindi, endi navbat tomoshabinlarga!
Film markazida ustoz va tarbiyaning inson hayotidagi o‘rni turadi.
“Dars” filmi kinoteatrlarda namoyish etila boshlandi. Filmning premyerasi 24-sentyabr kuni O‘zbekiston Milliy kino sanʼati saroyida bo‘lib o‘tdi.
Samimiy va hayotiy voqealar asosida suratga olingan filmda ustoz, kitob, tarbiya, mehr-oqibat va oilaviy qadriyatlarning inson hayotidagi o‘rni yoritiladi.
Kinokartinada tomoshabinni jalb etish uchun sunʼiy mojaro, fitna yoki qasos kabi syujetlarga emas, inson hayotini o‘zgartira oladigan oddiy va muhim qadriyatlarga eʼtibor qaratilgan.
Film voqealari markazida Oyqiz obrazi turadi. Uning orzulari, xatolari va hayotiy sinovlari orqali shoshqaloq va xayolparast qizning mustaqil fikrlaydigan, masʼuliyatli va yetuk insonga aylanish jarayoni ko‘rsatiladi.
Hanifa xola obrazi orqali esa baʼzan inson hayotida katta o‘zgarish yasash uchun bitta yaxshi ustozning o‘zi yetarli ekani tasvirlanadi.
Filmning 1-oktyabr — O‘qituvchi va murabbiylar kuni arafasida katta ekranlarga chiqishi ham alohida ahamiyat kasb etadi. “Dars” ota-onalar va farzandlar birgalikda tomosha qilishi, so‘ngra ustoz, kitob, tarbiya va hayotdagi maqsadlar haqida suhbatlashishi mumkin bo‘lgan oilaviy film sifatida taqdim etilmoqda.
25-sentyabrdan “Dars” filmi mamlakat kinoteatrlarida namoyish etilmoqda.
Film Kontent markazi va MA‘NO CINEMA tomonidan suratga olingan.
