56 ta yangi vagon: Toshkent metrosida vagonlarning qariyb 70 foizi yangilandi
Yangi avlod zamonaviy harakat tarkiblari metropolitenning 4 ta yo‘nalishida harakatlanmoqda.
Toshkent metropoliteni vagon parkiga 2026 yil davomida xarid qilinishi rejalashtirilgan 14 ta zamonaviy harakat tarkibi — jami 56 ta yangi vagon olib kelindi.
Metropolitenda xizmatlar sifatini oshirish va yo‘lovchilar uchun qulay sharoitlar yaratish maqsadida harakat tarkibini yangilashga alohida eʼtibor qaratilmoqda.
Joriy yilda yangi o‘quv yili boshlanguniga qadar rejalashtirilgan barcha 14 ta harakat tarkibi metropoliten vagon parkiga yetkazib berildi. Natijada Toshkent metropoliteni vagon parkining qariyb 70 foizi yangilandi.
Yangi avloddagi zamonaviy harakat tarkiblari metropolitenning 4 ta yo‘nalishida harakatlanmoqda. Bu, o‘z navbatida, poyezdlar qatnovi oralig‘ining, ayniqsa, kunning tig‘iz vaqtlarida sezilarli qisqarishiga imkon berdi.
Hozirda tig‘iz vaqtlarda poyezdlar:
Chilonzor yo‘nalishida — 1,5–2 daqiqalik;
O‘zbekiston yo‘nalishida — 3 daqiqalik;
Yunusobod yo‘nalishida — 4 daqiqalik;
Yer usti halqa yo‘nalishida — 7–8 daqiqalik interval bilan harakatlanmoqda.
