Bolalarga nisbatan jinsiy zo‘ravonlik uchun umrbod ozodlikdan mahrum etish jazosi taklif etildi — Shahnoza Mirziyoyeva
Bu haqdagi qonunchilikka o‘zgartirishlar mas’ul idoralar bilan birgalikda ishlab chiqilib, ko‘rib chiqish uchun taqdim etilgan.
Ijtimoiy himoya milliy agentligi mas’ul idoralar bilan birgalikda bolalarga nisbatan jinsiy zo‘ravonlik uchun javobgarlikni kuchaytirishga qaratilgan qonunchilik takliflarini ishlab chiqdi. Bu haqda agentlik direktorining birinchi o‘rinbosari Shahnoza Mirziyoyeva ma’lum qildi.
“Bolalarga nisbatan jinsiy zo‘ravonlik uchun umrbod ozodlikdan mahrum etish jazosi!” deya yozdi Shahnoza Mirziyoyeva.
Uning so‘zlariga ko‘ra, Ijtimoiy himoya milliy agentligi mas’ul idoralar bilan birgalikda bir necha oy davomida qonunchilikka o‘zgartirishlar kiritish bo‘yicha takliflar ustida ish olib bordi. Tayyorlangan takliflar ko‘rib chiqish uchun allaqachon taqdim etilgan.
Shuningdek, ota-onalarning bolalarga g‘amxo‘rlik qilmagani uchun, pedagoglarning esa zo‘ravonlik va kamsitish holatlariga yo‘l qo‘ygani uchun javobgarligini kuchaytirish, jabrlangan bolalarga tergov va sud jarayonining har bir bosqichida huquqiy yordam va himoya ta’minlanishi taklif etilmoqda.
