5 ming dollarlik gashish: tezkor tadbirlarda 4 kishi qo'lga olindi
Farg‘ona va Namanganda 2 kg 643 gramm gashish moddasi musodara qilindi.
Farg‘ona va Namangan viloyatlarida DXX, Ichki ishlar va Bojxona organlari hamkorligida o‘tkazilgan tezkor tadbirlarda jami 2 kg 643 gramm gashish moddasi musodara qilindi.
Farg‘ona viloyatida o‘tkazilgan tadbir davomida “Farg‘ona–Toshkent” yo‘nalishida harakatlangan “Cobalt” rusumli avtomobil Pop tumanidagi “Namangan” YPX maskanida to‘xtatilib, ko‘zdan kechirilgan. Tekshiruvda Chirchiq shahrida yashovchi, 1995-yilda tug‘ilgan fuqaro boshqaruvidagi avtomobil yukxonasiga yashirilgan 1 kg gashish moddasi aniqlangan.
Namangan viloyatining Chust tumanida o‘tkazilgan boshqa tadbirda esa “VAZ-2103” rusumli avtomobil tekshirilgan. Unda Yangi Namangan tumanida yashovchi, 1987-yilda tug‘ilgan, muqaddam sudlangan shaxsga tegishli avtomobil salonidan 995 gramm gashish moddasi topilgan.
Shuningdek, Namangan shahrida yashovchi, 1975-yilda tug‘ilgan fuqaroning xonadoni xolislar ishtirokida ko‘zdan kechirilganda, yerto‘lasidan 648 gramm gashish moddasi ashyoviy dalil sifatida olingan.
Tergovga ko‘ra, ushbu fuqaro giyohvandlik vositasini Yangi Namangan tumanida yashovchi, 1972-yilda tug‘ilgan tanishidan 5 ming AQSH dollariga sotib olgan. Mazkur shaxs ham protsessual tartibda ushlangan.
Qayd etilishicha, holatlar yuzasidan jinoyat ishlari qo‘zg‘atilib, hozirda tergov harakatlari olib borilmoqda.
