Andijonda yuk mashinasi 5 ta avtomobil bilan to‘qnashdi: jarohatlanganlar yo‘q
Hodisaga tormoz tizimidagi texnik nosozlik sabab bo‘lgan.
Andijon tumanida tormoz tizimida texnik nosozlik yuzaga kelgan yuk mashinasi svetoforda to‘xtab turgan 5 ta avtomobil bilan to‘qnashdi. Hodisa oqibatida fuqarolar jarohatlanmagan.
Viloyat YHXB matbuot xizmatining xabar berishicha, yo‘l-transport hodisasi 27-sentyabr kuni soat 14:45 larda Andijon tumanidagi “CHYM” MFY hududidan o‘tuvchi A-373 Toshkent–O‘sh avtomobil yo‘lining 334-kilometrida sodir bo‘lgan.
Dastlabki maʼlumotlarga ko‘ra, 1976-yilda tug‘ilgan A. M. boshqaruvidagi “GAZ-53” rusumli yuk avtomashinasi “Bog‘ishamol” hududidan “Aeroport” yo‘nalishida harakatlangan. Haydovchi tormoz tizimidagi texnik nosozlik sabab oraliq masofani saqlay olmagan.
Natijada tartibga solingan chorrahadagi svetoforning taqiqlovchi qizil chirog‘ida to‘xtab turgan “Damas”, “Nexia-2”, “Matiz”, “Spark” va “Labo” avtomobillari bilan to‘qnashuv sodir bo‘lgan.
YTH oqibatida fuqarolar tan jarohati olmagan. Transport vositalariga texnik shikast yetgan.
Holat yuzasidan Andijon tumani IIB YHXG xodimlari tomonidan belgilangan tartibda surishtiruv ishlari olib borilmoqda.
